گورنمنٹ کالج یونیورسٹی لاہور میں ایم فل گلوبل سٹڈیز پروگرام کیلئے ایچ ای سی کا این اوسی جاری
یہ پروگرام پاکستان میں بین الضابطہ تحقیق، پالیسی سٹڈیز اور عالمی امور کے مطالعے کے حوالے سے ایک اہم پیش رفت قرار دیا جا رہا ہے۔ گلوبل سٹڈیز کا شعبہ طلبہ کو صرف ایک مضمون تک محدود رکھنے کے بجائے انہیں سیاست، معیشت، سماج، تاریخ، بین الاقوامی تعلقات، امن و سلامتی، ترقی، ماحولیات اور عالمی اداروں جیسے مختلف موضوعات کو ایک ساتھ سمجھنے کا موقع فراہم کرے گا۔
یہ بھی پڑھیں: ایم ڈی کیٹ امیدواروں کیلئے بڑی خوشخبری
یونیورسٹی انتظامیہ کے مطابق ایم فل گلوبل سٹڈیز کا مقصد ایسے محققین تیار کرنا ہے جو عالمی اور قومی سطح پر ابھرتے ہوئے مسائل کو تحقیقی بنیادوں پر سمجھ سکیں اور ان کے ممکنہ حل کیلئے علمی و پالیسی سطح پر کردار ادا کر سکیں۔ اس پروگرام میں داخلہ لینے والے طلبہ عالمی سیاست، بین الاقوامی تنازعات، معاشی تبدیلیوں، موسمیاتی تبدیلی، علاقائی تعاون، انسانی حقوق، گورننس اور پائیدار ترقی جیسے اہم موضوعات پر تحقیق کریں گے۔
گورنمنٹ کالج یونیورسٹی لاہور کا یہ اقدام اعلیٰ تعلیم کے شعبے میں تحقیق کے نئے رجحانات کو فروغ دینے میں مددگار ثابت ہوگا۔ اس پروگرام کے ذریعے نوجوان محققین کو عالمی سطح پر بدلتے حالات، پاکستان کے علاقائی کردار، عالمی طاقتوں کی پالیسیوں اور جدید چیلنجز کو سمجھنے کا موقع ملے گا۔
