سرکاری ہسپتال میں پیدا ہونیوالے ہر بچے کیلئے سونے کی انگوٹھی کا اعلان
بھارتی میڈیا کے مطابق تمل ناڈو حکومت کی جانب سے شروع کی گئی اس اسکیم کا نام ’’تھائی ماما تھنگا موتھیرا تھٹم‘‘ رکھا گیا ہے جس کے تحت سرکاری اسپتالوں میں پیدا ہونے والے ہر نومولود کو تحفے کے طور پر ایک گرام سونے کی انگوٹھی دی جائے گی۔
حکام کے مطابق اس اقدام کا بنیادی مقصد غریب اور متوسط طبقے کے خاندانوں کو سہولت فراہم کرنا، سرکاری ہسپتالوں پر عوام کا اعتماد بڑھانا اور محفوظ زچگی کو فروغ دینا ہے۔
تمل ناڈو حکومت نے اس اسکیم کے لیے سالانہ 755.83 کروڑ بھارتی روپے کا بجٹ مختص کیا ہے۔
اعلان کے مطابق 22 جون 2026 یا اس کے بعد سرکاری ہسپتالوں میں پیدا ہونے والے بچے اس اسکیم کے اہل ہوں گے۔
ریاستی حکام کا کہنا ہے کہ وزیر اعلیٰ وجے اس اسکیم کا باضابطہ افتتاح 15 ستمبر کو سی این اناڈورائی کے یوم پیدائش کے موقع پر کریں گے۔
سرکاری بیان کے مطابق یہ منصوبہ حکومت کے وسیع تر وژن ’’ویٹری تملھگم‘‘ کا حصہ ہے، جس کے تحت ماؤں اور بچوں کو بہتر طبی سہولیات، تحفظ اور مالی معاونت فراہم کرنا حکومت کی ترجیحات میں شامل ہے۔
یہ بھی پڑھیں: دبئی جانے والوں کیلئے خوشخبری، مفت لگژری رہائش کا اعلان
حکام کے مطابق تمل ثقافت میں سونے کی انگوٹھی خوشحالی، برکت اور نیک شگون کی علامت سمجھی جاتی ہے، اس لیے بچوں کو یہ تحفہ نہ صرف مالی مدد فراہم کرے گا بلکہ خاندانوں کے لیے جذباتی اہمیت بھی رکھے گا۔
ماہرین کے مطابق اس اسکیم سے ریاست بھر کے ہزاروں خاندان مستفید ہوں گے جبکہ سرکاری ہسپتالوں میں زچگی کے رجحان میں بھی اضافہ متوقع ہے۔
