مولانا فضل الرحمان کے قریبی ساتھی مفتی ابرار کے ناقابل ضمانت وارنٹ گرفتاری
تفصیلات کے مطابق اسلام آباد پولیس کی تھانہ انڈسٹریل ایریا کی ٹیم سیکٹر آئی نائن فور میں واقع مسجد فاروق اعظم پہنچی، جہاں مفتی ابرار کے نام جاری ناقابل ضمانت وارنٹ گرفتاری کی تعمیل کی گئی۔ ذرائع کے مطابق مفتی ابرار گرفتاری کے خدشے کے پیش نظر روپوش ہیں، جبکہ عدالت نے انہیں فوری گرفتار کرکے پیش کرنے کا حکم دے رکھا ہے۔
مفتی ابرار کے خلاف تھانہ انڈسٹریل ایریا میں مقدمہ نمبر 1212/26 درج ہے، جس میں انسداد دہشت گردی ایکٹ سمیت مختلف سنگین دفعات شامل کی گئی ہیں۔ مقدمہ 7 نومبر 2026 کو سیکٹر آئی نائن فور میں مبینہ طور پر بغیر اجازت احتجاجی اجتماع کرنے، سڑکیں بند کرنے اور دفعہ 144 کی خلاف ورزی کے الزامات کے تحت درج کیا گیا تھا۔
یہ بھی پڑھیں: مولانا فضل الرحمان سے سیکیورٹی واپس لے لی گئی
ایف آئی آر کے مطابق احتجاجی اجتماع کے دوران مبینہ طور پر پولیس اہلکاروں پر پتھراؤ کیا گیا، سرکاری گاڑیوں کو نقصان پہنچایا گیا اور سرکاری امور کی انجام دہی میں مداخلت کی گئی۔ مقدمے میں یہ الزام بھی عائد کیا گیا ہے کہ مشتعل افراد نے اسلحے کے زور پر سرکاری اہلکاروں کو فرائض کی ادائیگی سے روکنے کی کوشش کی۔
ایف آئی آر میں مزید کہا گیا ہے کہ غیر قانونی اجتماع کے باعث عام شہریوں، مسافروں اور قریبی رہائشی فلیٹس میں مقیم افراد کی جان و مال کو بھی خطرات لاحق ہوئے۔
دوسری جانب انسداد دہشت گردی کی خصوصی عدالت اسلام آباد نے عدالتی احکامات کی عدم تعمیل اور گرفتاری سے بچنے پر مفتی ابرار کے ناقابل ضمانت وارنٹ گرفتاری جاری کیے تھے۔ عدالت کی جانب سے ان کی فوری گرفتاری کے احکامات کے بعد پولیس نے کارروائیاں شروع کر رکھی ہیں۔
پولیس کی جانب سے وارنٹ گرفتاری کی تعمیل کے بعد مفتی ابرار کی گرفتاری کے لیے مزید کوششیں جاری ہیں، تاہم تاحال ان کی گرفتاری کی تصدیق نہیں ہو سکی۔
واضح رہے کہ مفتی ابرار کے خلاف درج مقدمے میں عائد الزامات تاحال عدالتی کارروائی کا حصہ ہیں اور ان کی قانونی حیثیت کا تعین عدالت میں ہوگا۔