حکومت کا بیرون ملک تعلیم کیلئے اسکالرشپس کا اعلان
بلوچستان حکومت کے مطابق بلوچستان ایجوکیشن انڈومنٹ فنڈ کے تحت ہر سال 10 باصلاحیت امیدواروں کو بیرون ملک ممتاز جامعات میں پی ایچ ڈی کی تعلیم کے لیے اسکالرشپس دی جائیں گی۔ اس پروگرام کا مقصد صوبے کے نوجوانوں کو عالمی معیار کی تعلیم اور تحقیق کے مواقع فراہم کرنا ہے۔
وزیراعلیٰ بلوچستان سرفراز بگٹی نے پی ایچ ڈی اسکالرشپ پروگرام کے اجرا پر خوشی کا اظہار کرتے ہوئے اسے صوبے کے نوجوانوں کے روشن مستقبل کی جانب اہم قدم قرار دیا۔
سرفراز بگٹی کا کہنا تھا کہ نوجوانوں کو دنیا کی بہترین جامعات تک پہنچانے کا سفر شروع ہوچکا ہے اور یہ بلوچستان کے مستقبل کو تبدیل کرنے کی کوشش ہے،عالمی جامعات میں بلوچستان کے نوجوانوں کے لیے مواقع پیدا ہوں گے اور صوبے کے نوجوان تعلیم اور تحقیق کے میدان میں دنیا سے پیچھے نہیں رہیں گے۔
وزیراعلیٰ نے کہا کہ پی ایچ ڈی اسکالرشپس آنے والی نسلوں کے لیے امید، علم اور ترقی کے نئے دروازے کھولیں گی، دہشت گردی کا مقابلہ علم، شعور اور ترقی کے مواقع فراہم کرکے کیا جاسکتا ہے۔
سرفراز بگٹی نے مزید کہا کہ بلوچستان کا مستقبل علم اور تحقیق کے میدان میں نمایاں مقام حاصل کرنے والے نوجوان ہیں۔ حکومت کا مقصد صوبے کے نوجوانوں کو عالمی سطح پر تعلیم اور تحقیق کے نقشے پر نمایاں مقام دلانا ہے۔
یہ بھی پڑھیں:موسم کیسا رہے گا؟ محکمہ موسمیات نے بتا دیا
اس پروگرام کے ذریعے ہر سال منتخب امیدواروں کو بیرون ملک پی ایچ ڈی کے لیے تعلیمی مواقع میسر آئیں گے۔
