سہیل آفریدی کا لانگ مارچ شروع کرنے کا اعلان، روٹ میپ جاری
سہیل آفریدی نے سماجی رابطے کی ویب سائٹ ایکس پر جاری بیان میں کہا کہ لانگ مارچ کا پہلا مرحلہ گنڈی چوک لکی مروت سے شروع ہوگا۔
ان کے مطابق ٹانک، ڈیرہ اسماعیل خان، جنوبی و شمالی وزیرستان، بنوں اور لکی مروت سے تعلق رکھنے والے افراد مارچ میں شریک ہوں گے، جبکہ قافلہ رات کو کرک کے قریب قیام کرے گا۔
وزیراعلیٰ خیبرپختونخوا کے مطابق 5 اکتوبر کو دوپہر 12 بجے کرک کے عوام مارچ میں شامل ہوں گے، جس کے بعد قافلہ روانہ ہوگا اور رات کوہاٹ کے قریب قیام کرے گا۔
انہوں نے بتایا کہ 6 اکتوبر کو کوہاٹ، ہنگو، کرم اور اورکزئی کے اضلاع سے آنے والے افراد قافلے کا حصہ بنیں گے، جبکہ رات پشاور کے متنی کے قریب گزاری جائے گی۔
سہیل آفریدی کے مطابق 7 اکتوبر کو بڈھ بیر کے مقام پر ضلع خیبر اور پشاور کے مختلف حلقوں کے عوام قافلے کا استقبال کریں گے، اس کے بعد مارچ چارسدہ انٹرچینج کی جانب روانہ ہوگا، جہاں رات قیام کیا جائے گا۔
انہوں نے مزید بتایا کہ 8 اکتوبر کو چارسدہ اور مہمند کے عوام بھی مارچ میں شامل ہوں گے، جبکہ پورے خیبرپختونخوا سے آنے والے افراد خیرآباد کے مقام پر جمع ہوں گے۔
یہ بھی پڑھیں:رینجرز کی تعیناتی میں توسیع، نوٹیفکیشن جاری
سہیل آفریدی کا کہنا ہے کہ خیرآباد میں قیام کے بعد لانگ مارچ کے آئندہ مرحلے اور حتمی لائحہ عمل کا اعلان کیا جائے گا۔
