سعودی عرب میں پاکستانیوں کی سیاسی سرگرمیوں پر سفارتخانے کا انتباہ
سفارتخانے نے سوشل میڈیا پلیٹ فارم ایکس پر جاری بیان میں کہا کہ سعودی قوانین کے تحت کسی بھی قسم کی سیاسی سرگرمی میں حصہ لینا ممنوع ہے۔ اس لیے پاکستانی شہری سیاسی اجتماعات، مظاہروں، سیاسی جماعتوں کی سرگرمیوں اور سیاسی نظریات کی تشہیر سے دور رہیں۔
بیان میں سوشل میڈیا کے محتاط اور ذمہ دارانہ استعمال پر بھی زور دیا گیا، پاکستانی شہریوں کو ہدایت کی گئی ہے کہ وہ غیر مصدقہ خبریں یا افواہیں پھیلانے سے گریز کریں اور سیاسی یا فرقہ وارانہ بحث، تکرار اور اشتعال انگیز مواد شیئر نہ کریں۔
سفارتخانے نے سعودی حکومت کی پالیسیوں پر تنقید یا اشتعال انگیزی پر مبنی مواد سے بھی اجتناب کرنے کا مشورہ دیا ہے، اس کے علاؤہ خطے کی سیاسی اور سکیورٹی صورتحال کو سنسنی خیز انداز میں پیش کرنے سے بھی گریز کرنے کی ہدایت کی گئی ہے۔
یہ بھی پڑھیں: پاک سعودی سفارتی پاسپورٹ پر ویزا شرط ختم
سفارتخانے کے مطابق سعودی عرب کے مقامی قوانین کی خلاف ورزی پر قانونی کاروائی بھی ہوسکتی ہے۔ جس میں گرفتاری، جرمانہ، قید، ملک بدری اور دوبارہ سعودی عرب میں داخلے پر پابندی جیسے اقدامات شامل ہوسکتے ہیں۔
یہ ہدایات ایک ایسے وقت میں سامنے آئی ہیں جب پاکستان اور سعودی عرب کے درمیان دفاعی، سفارتی اور سکیورٹی تعاون جاری ہے۔ پاکستان کی وزارت خارجہ نے بھی رواں ماہ سعودی عرب کی خودمختاری، سلامتی اور علاقائی استحکام کے حق میں متعدد بیانات جاری کیے ہیں۔
