ملک میں سونے کی قیمت میں مسلسل تیسرے روز بڑی کمی

ملک بھر کی صرافہ مارکیٹوں میں سونے کی قیمت میں کاروباری ہفتے کے تیسرے روز بھی بڑی کمی ریکارڈ کی گئی ہے، جس کے بعد فی تولہ سونا 4 لاکھ 53 ہزار 936 روپے کا ہوگیا۔

اسی طرح 10 گرام سونے کی قیمت 1544 روپے کم ہوکر 3 لاکھ 89 ہزار 176 روپے ہوگئی۔

دوسری جانب عالمی مارکیٹ میں سونے کی قیمت 18 ڈالر کمی کے بعد 4314 ڈالر فی اونس ہوگئی، جس کے اثرات مقامی صرافہ مارکیٹ میں بھی دیکھے گئے۔

یہ بھی پڑھیں: عالمی منڈی میں تیل کی قیمتیں کم ہوگئیں

اسی طرح عالمی مارکیٹ میں چاندی کمی کے بعد 65.30 ڈالر فی اونس کی سطح پر آگئی جب کہ مقامی سطح پر چاندی 30 روپے فی تولہ کمی کے ساتھ 7008 روپے اور فی 10 گرام چاندی 25 روپے کمی کے ساتھ 6008 روپے کی ہو گئی۔

پاکستان میں سونے کی قیمت رواں ماہ مسلسل اتار چڑھاؤ کا شکار رہی ہے۔ ستمبر کے دوران فی تولہ سونے کی قیمت تقریباً 4 لاکھ 43 ہزار 647 روپے سے 4 لاکھ 59 ہزار 540 روپے کے درمیان رہی۔

سونا روایتی طور پر سرمایہ کاری کا ایک اہم ذریعہ سمجھا جاتا ہے اور عالمی سطح پر اس کی قیمت پر افراط زر، شرح سود، معاشی حالات اور عالمی مالیاتی مارکیٹ میں ہونے والی تبدیلیاں اثرانداز ہوتی ہیں۔ غیر یقینی معاشی حالات میں سرمایہ کار اکثر سونے کی جانب بھی رخ کرتے ہیں۔