سرحدی علاقوں میں زلزلے کے شدید جھٹکے
زلزلہ پیما مرکز کے مطابق چمن اور ملحقہ سرحدی علاقوں میں آنے والے زلزلے کی شدت ریکٹر اسکیل پر 3.8 ریکارڈ کی گئی جبکہ اس کی زیرِ زمین گہرائی 12 کلومیٹر تھی۔
زلزلے کا مرکز چمن کے قریب واقع پہاڑی سلسلے میں تھا، زلزلے کے جھٹکے محسوس ہوتے ہی بعض علاقوں میں شہری گھروں اور عمارتوں سے باہر نکل آئے اور محفوظ مقامات کا رخ کیا۔
زلزلے کے بعد متعلقہ اداروں کی جانب سے صورتحال کا جائزہ لیا گیا تاہم ابتدائی اطلاعات کے مطابق کسی قسم کے جانی نقصان یا املاک کو نقصان پہنچنے کی اطلاع نہیں ملی۔
واضح رہے کہ گزشتہ روز بھی خیبرپختونخوا کے مختلف علاقوں میں زلزلے کے جھٹکے محسوس کیے گئے تھے۔ چترال، سوات، ملاکنڈ اور ضلع مہمند سمیت متعدد علاقوں میں شہریوں نے زلزلے کے جھٹکے محسوس کیے۔
زلزلہ پیما مرکز کے مطابق گزشتہ روز آنے والے زلزلے کی شدت ریکٹر اسکیل پر 4.9 ریکارڈ کی گئی تھی جبکہ زلزلے کی گہرائی 196 کلومیٹر تھی۔
حکام کے مطابق گزشتہ زلزلے کا مرکز کوہِ ہندوکش کا پہاڑی سلسلہ بتایا گیا تھا۔
یہ بھی پڑھیں:لاہور بورڈ انٹرمیڈیٹ پارٹ 2 کے نتائج کا اعلان
مسلسل زلزلوں کے باعث مختلف علاقوں میں شہریوں میں تشویش پائی جا رہی ہے، تاہم متعلقہ اداروں کے مطابق چمن میں آنے والے تازہ زلزلے کے بعد فی الحال کسی بڑے نقصان کی اطلاع موصول نہیں ہوئی۔
