حکومت سے 100 روپے سستا پیٹرول حاصل کرنے کا ڈیجیٹل نظام فعال
وزارتِ آئی ٹی کے مطابق موٹر سائیکل، رکشہ، چنگچی اور 800 سی سی تک کی گاڑیوں کے مالکان کو اس اسکیم سے فائدہ پہنچایا جائے گا۔
حکومت نے سخت معاشی حالات میں محنت کش اور کم آمدن والے طبقے کو ریلیف دینے کیلئے سبسڈی کی فراہمی کا عمل شفاف اور خودکار بنانے کیلئے یہ نظام تیار کیا ہے۔
اس سلسلے میں وزارتِ آئی ٹی نے صوبائی محکموں، نادرا اور ٹیلی کام آپریٹرز کے تعاون سے جامع ڈیجیٹل نظام تشکیل دیا ہے، جس کے ذریعے مستحق شہریوں کی شناخت اور گاڑیوں کی تصدیق کا عمل خودکار طریقے سے مکمل کیا جائے گا۔
حکام کے مطابق اسکیم کے تحت اہل شہریوں کو پیٹرول کی فی لیٹر قیمت پر 100 روپے کی رعایت دی جائے گی۔ موٹر سائیکل اور چنگچی رکشہ مالکان کیلئے ماہانہ 20 لیٹر جبکہ 800 سی سی تک کی گاڑیوں کیلئے ماہانہ 30 لیٹر رعایتی پیٹرول کی حد مقرر کی گئی ہے۔
صوبائی محکمہ ٹرانسپورٹ اور ایکسائز کے تعاون سے گاڑیوں کی تصدیق کا نظام بھی ڈیجیٹل کر دیا گیا ہے تاکہ سبسڈی کا فائدہ صرف اہل افراد تک پہنچایا جا سکے۔
یہ بھی پڑھیں:حکومت کی جانب سے پیٹرول پر ریلیف کس طرح حاصل کیا جائے؟ تفصیلات سامنے آ گئیں
حکومت کا کہنا ہے کہ جدید نظام کے ذریعے پیٹرول سبسڈی کی تقسیم میں شفافیت برقرار رکھنے کے ساتھ ساتھ حقدار شہریوں کو بروقت ریلیف فراہم کیا جائے گا۔
