آزاد کشمیر کے فیصلے عوامی مفاد کے مطابق ہوں گے، عبدالعلیم خان
آزاد کشمیر کے سابق وزیراعظم سردار تنویر الیاس نے اپنی سیاسی رفاقتوں کے ساتھ استحکام پاکستان پارٹی میں شمولیت کا اعلان کیا ہے ان کے ہمراہ کرنل کرنل محبوب، علی خان سونی، ملک ذوالفقار، صاحبہ صدیق، ریاض گجر، طاہر کھوکھر، راجہ طالب، مرتضیٰ علی احمد، جبار مغل، تقدیس گیلانی اور دیگر رہنما بھی پارٹی میں شامل ہوئے۔
شمولیتی تقریب کے بعد پریس کانفرنس کرتے ہوئے عبدالعلیم خان نے کہا کہ کشمیری عوام سے کیے گئے وعدے پورے کئے جائیں گے اور بچوں کو تعلیم کی سہولت فراہم کرنے کے لیے عملی اقدامات کیے جائیں گے، ان کا کہنا تھا کہ سیاست کا مقصد صرف اقتدار حاصل کرنا نہیں بلکہ عوام کی زندگی آسان بنانا اور انہیں بنیادی سہولتیں فراہم کرنا ہے۔
یہ بھی پڑھیں: اسحاق ڈار سے متعلق الزامات کے ثبوت پیش کیے جائیں، رانا ثنا اللہ
انہوں نے کہا کہ اگر انکی جماعت کو حکومت بنانے کا موقع ملا تو میرٹ، شفافیت اور عوامی خدمت کو ہر حال میں یقینی بنایا جائے گا۔ انہوں نے سیاسی جماعتوں پر تنقید کرتے ہوئے کہا کہ برسوں اقتدار میں رہنے والوں کو پہلے اپنی کارکردگی کا حساب دینا چاہیے۔
عبدالعلیم خان نے وزیراعظم کی قیادت کو سراہتے ہوئے کہا کہ مشکل حالات میں بھی انہوں نے حوصلہ نہیں ہارا، انہوں نے بتایا کہ ملک بھر میں شاہراہوں اور موٹرویز کے کئی اہم منصوبوں پر کام جاری ہے، جن میں گلگت بلتستان میں شاہراہوں پر کام ہو رہا ہے جبکہ سکھر تا کراچی موٹروے کو بندرگاہ سے منسلک کیا جا رہا ہے اور اس منصوبے پر رواں سال کام شروع ہوگا، لاہور، سیالکوٹ موٹروے کو چار کے بجائے چھ رویہ بنایا جا رہا ہے، لاہور، سیالکوٹ، کھاریاں، اسلام آباد موٹروے کی تعمیر بھی جاری ہے جس سے لاہور اور اسلام آباد کے درمیان تقریباً 100 کلومیٹر کا فاصلہ کم ہو جائے گا، اسلام آباد۔ مری ایکسپریس وے کو مظفرآباد تک توسیع دی جا رہی ہے جبکہ مظفرآباد کو مانسہرہ سے بھی جدید شاہراہ کے ذریعے منسلک کیا جائے گا، جس سے آزاد کشمیر سمیت مختلف علاقوں میں سفری سہولتیں بہتر ہوں گی۔
