عالمی منڈی میں تیل کی قیمتیں بڑھ گئیں
تفصیلات کے مطابق برینٹ خام تیل کی قیمت میں 29 سینٹ، یعنی 0.28 فیصد اضافہ ہوا اور یہ 102.60 ڈالر فی بیرل پر پہنچ گیا۔ امریکی ویسٹ ٹیکساس انٹرمیڈیٹ (WTI) کی قیمت 27 سینٹ، یعنی 0.29 فیصد اضافے کے بعد 93.14 ڈالر فی بیرل ہوگئی۔
ذہن نشین رہے کہ ایک روز قبل تیل کی قیمتوں میں نمایاں اضافہ ہوا تھا، برینٹ کی قیمت 4 ڈالر سے زیادہ بڑھی، جبکہ ڈبلیو ٹی آئی میں 2 ڈالر سے زیادہ کا اضافہ ریکارڈ کیا گیا۔
مارکیٹ میں یہ ردعمل چین کی ایندھن برآمدات روکنے کی اطلاعات اور امریکا کی جانب سے مشرقِ وسطیٰ میں مزید فوج بھیجنے سے متعلق رپورٹ کے بعد سامنے آیا۔
رپورٹس کے مطابق سعودی عرب سے تیل کی برآمدات کی بہتر صورتحال ایک طرف قیمتوں پر دباؤ کم کررہی ہے، تاہم خلیج کی جانب مزید امریکی طیارہ بردار بحری جہاز کی روانگی اور چین کی جانب سے ریفائنڈ مصنوعات کی برآمدات محدود کرنے کی اطلاعات اس کے برعکس اثر ڈال رہی ہیں۔
یہ بھی پڑھیں:پیٹرولیم مصنوعات کی قیمتوں میں رد و بدل ، نوٹی فکیشن جاری
برینٹ کی قیمت رواں ہفتے مجموعی طور پر تقریباً 1.93 فیصد کمی کی جانب گامزن ہے، تاہم ستمبر میں اس کی قیمت مجموعی طور پر تقریباً 14 فیصد بڑھی تھی۔ دوسری جانب ڈبلیو ٹی آئی نے گزشتہ ماہ تقریباً 4 فیصد اضافہ ریکارڈ کیا۔
