موٹروے پر سفر مزید مہنگا، ٹول ٹیکس میں بھاری اضافہ
نیشنل ہائی وے اتھارٹی (این ایچ اے) نے موٹروے ایم ٹو کے نئے ٹول ریٹس کا باقاعدہ نوٹیفکیشن جاری کر دیا جس کے مطابق ٹول ٹیکس میں 7 فیصد اضافہ کیا گیا ہے۔
نوٹیفکیشن کے مطابق نئے ٹول ریٹس کا اطلاق 5 جولائی 2026 سے ہو گا جبکہ یہ شرحیں 23 اپریل 2027 تک نافذ العمل رہیں گی۔
این ایچ اے کے مطابق ٹول ٹیکس میں اضافہ 2014 کے معاہدے کے تحت کیا گیا ہے جس کے مطابق مخصوص مدت کے بعد ٹول ریٹس میں اضافہ کیا جاتا ہے۔
نئے شیڈول کے تحت لاہور اسلام آباد موٹروے پر کار، جیپ اور ٹیکسی کے لیے ٹول ٹیکس بڑھا کر ایک ہزار 430 روپے مقرر کر دیا گیا ہے، ویگن کے لیے ٹول ٹیکس 2 ہزار 390 روپے جبکہ کوسٹر کے لیے 3 ہزار 350 روپے مقرر کیا گیا ہے۔
این ایچ اے کے جاری کردہ نوٹیفکیشن کے مطابق بسوں کے لیے ٹول ٹیکس 4 ہزار 770 روپے مقرر کیا گیا ہے، اس کے علاوہ 2 اور 3 ایکسل ٹرکوں کو 6 ہزار 210 روپے ٹول ادا کرنا ہو گا جبکہ آرٹیکیولیٹڈ ٹرکوں کے لیے ٹول ٹیکس 7 ہزار 980 روپے مقرر کیا گیا ہے۔
یہ بھی پڑھیں: موٹروے پر تمام گاڑیوں میں آگ بجھانے والے آلات کی موجودگی لازمی قرار
ٹول ٹیکس میں اضافے کے بعد لاہور سے اسلام آباد سفر کرنے والے شہریوں، ٹرانسپورٹرز اور کمرشل گاڑی مالکان کے اخراجات میں مزید اضافہ ہو جائے گا۔
ٹرانسپورٹ شعبے سے وابستہ افراد کا کہنا ہے کہ موٹروے ٹول ریٹس میں اضافے کا اثر کرایوں اور سامان کی ترسیل کے اخراجات پر بھی پڑ سکتا ہے۔
این ایچ اے حکام کے مطابق نئے ٹول ریٹس مقررہ پالیسی اور معاہدے کے تحت نافذ کیے گئے ہیں۔
