اسٹاک ایکسچینج میں زبردست تیزی، ڈالر مستحکم
دوسری جانب امریکی ڈالر کی قدر میں بھی استحکام برقرار رہا، جسے معاشی حلقے خوش آئند قرار دے رہے ہیں۔
تفصیلات کے مطابق کاروبار کے آغاز پر پاکستان اسٹاک ایکسچینج کے 100 انڈیکس میں 422 پوائنٹس کا اضافہ ریکارڈ کیا گیا، جس کے بعد انڈیکس ایک لاکھ 78 ہزار 115 پوائنٹس کی سطح پر ٹریڈ کرتا رہا۔
گزشتہ کاروباری روز کے اختتام پر 100 انڈیکس 177 ہزار 692 پوائنٹس پر بند ہوا تھا، تاہم آج ابتدائی سیشن میں سرمایہ کاروں کی جانب سے خریداری کے رجحان نے مارکیٹ کو نئی بلندیوں کی جانب گامزن کر دیا۔
مارکیٹ ماہرین کے مطابق مختلف شعبوں میں سرمایہ کاری بڑھنے اور معاشی اشاریوں میں بہتری کی توقعات کے باعث حصص بازار میں مثبت ماحول پیدا ہوا ہے، ان کا کہنا ہے کہ اگر یہی رجحان برقرار رہا تو آنے والے دنوں میں مارکیٹ مزید مضبوط ہو سکتی ہے۔
دوسری جانب انٹر بینک مارکیٹ میں امریکی ڈالر کی قیمت میں کوئی نمایاں تبدیلی ریکارڈ نہیں کی گئی، کرنسی مارکیٹ کے اعداد و شمار کے مطابق امریکی ڈالر 278 روپے 21 پیسے کی سطح پر مستحکم رہا۔
یہ بھی پڑھیں:مرغی اور انڈوں کی قیمتوں کو پَر لگ گئے
معاشی ماہرین کا کہنا ہے کہ ڈالر کی قدر میں استحکام درآمدی اخراجات اور مہنگائی کے دباؤ کو کم کرنے میں مددگار ثابت ہو سکتا ہے۔
معاشی تجزیہ کاروں کے مطابق اسٹاک مارکیٹ میں تیزی اور ڈالر کے استحکام کو ملکی معیشت کیلئے مثبت اشارہ سمجھا جا رہا ہے، جس سے سرمایہ کاروں کے اعتماد میں مزید اضافہ متوقع ہے۔
