کینیڈا میں امیگریشن کا نیا قانون نافذ، دستاویزات کی جانچ سخت
غیر ملکی میڈیا رپورٹس کے مطابق نئے قانون کے تحت متعلقہ کینیڈین حکام کو اختیار حاصل ہوگیا ہے کہ اگر کسی امیگریشن درخواست میں دستاویزات غلط، نامکمل یا جعل سازی پر مبنی پائی جائیں تو اس کی کارروائی فوری طور پر معطل یا ختم کی جاسکتی ہے۔
نئے قانون کے تناظر میں کینیڈا کے ورک پرمٹ، اسٹڈی پرمٹ یا مستقل رہائش کے لیے درخواست دینے والے افراد کو اپنے تمام کاغذات کی درستگی اور اصلیت یقینی بنانے کی ہدایت کی گئی ہے۔ درخواست کے ساتھ جمع کروائے جانے والے سرٹیفکیٹس، تعلیمی اسناد اور دیگر ریکارڈز کا اصل، مکمل اور قابلِ تصدیق ہونا ضروری ہے۔
امیگریشن درخواست میں کسی ایک دستاویز میں بھی غلطی، غلط معلومات یا ضروری تفصیلات کی کمی درخواست کی کارروائی میں رکاوٹ بن سکتی ہے، جبکہ سنگین خلاف ورزی کی صورت میں درخواست مسترد ہونے کا خدشہ بھی موجود ہے۔
درخواست گزاروں کو مشورہ دیا گیا ہے کہ وہ غیر تصدیق شدہ امیگریشن ایجنٹس پر بھروسہ کرنے سے گریز کریں اور درخواست جمع کروانے سے پہلے تمام دستاویزات کی جانچ اور تصدیق کینیڈا کے سرکاری اور مجاز ذرائع سے کروائیں، تاکہ امیگریشن کے عمل کے دوران ممکنہ مسائل سے بچا جاسکے۔
