پاناما میں 7.7 شدت کا تباہ کن زلزلہ، عمارتیں منہدم
حکام کے مطابق زلزلے کے بعد مختلف علاقوں سے عمارتوں کو نقصان پہنچنے کی اطلاعات موصول ہوئیں، تاہم ابتدائی اطلاعات کے مطابق اب تک کسی جانی نقصان یا افراد کے زخمی ہونے کی تصدیق نہیں ہوئی۔
امریکی جیولوجیکل سروے کے مطابق زلزلے کا مرکز پاناما کے دارالحکومت پاناما سٹی سے تقریباً 200 کلومیٹر دور ایک کم آبادی والے علاقے میں تھا۔ زلزلے کی گہرائی زمین سے 12.6 کلومیٹر ریکارڈ کی گئی، جس کے باعث شدید جھٹکے محسوس کیے گئے۔
زلزلے کے نتیجے میں پینونومے شہر میں متعدد عمارتیں منہدم ہونے کی اطلاعات سامنے آئیں، جبکہ مختلف مقامات پر عمارتوں کو نقصان پہنچنے کے بعد شہریوں میں خوف و ہراس پھیل گیا۔ زلزلے کے بعد کئی آفٹر شاکس بھی محسوس کیے گئے، جس کے باعث لوگ مزید احتیاط برتنے لگے۔
دوسری جانب پاناما کینال میں بحری جہازوں کی آمدورفت اور آپریشن معمول کے مطابق جاری رہے۔ حکام کے مطابق زلزلے کے باوجود اس اہم آبی گزرگاہ کی سرگرمیاں متاثر نہیں ہوئیں۔
زلزلے کے باعث ٹوکومن انٹرنیشنل ایئرپورٹ پر پروازیں بھی کچھ دیر کے لیے معطل کردی گئی تھیں، تاہم صورتحال کا جائزہ لینے کے بعد پروازوں کا سلسلہ دوبارہ بحال کردیا گیا۔
زلزلے کے بعد متعلقہ حکام صورتحال کی نگرانی کر رہے ہیں، جبکہ متاثرہ علاقوں میں عمارتوں کو پہنچنے والے نقصان اور ممکنہ آفٹر شاکس کے اثرات کا جائزہ لیا جا رہا ہے۔
یہ بھی پڑھیں:دھروو راٹھی احتجاج سے پہلے پولیس کی حراست میں
ابتدائی اطلاعات کے مطابق بڑے پیمانے پر خوف و ہراس کے باوجود کسی جانی نقصان کی اطلاع سامنے نہیں آئی، تاہم صورتحال کی مزید تفصیلات کا انتظار ہے۔
