پنشنرز کیلئے اہم خبر،حکومت کا بڑا اعلان
نادرا کے پبلک انفارمیشن آفیسر سید شہاب علی کے مطابق حکومت نے ایسا کوئی فیصلہ نہیں کیا جس کے تحت ستمبر تک نادرا سے پروف آف لائف سرٹیفکیٹ جاری نہ ہونے پر پنشن کی ادائیگی روک دی جائے۔
نادرا متعلقہ اداروں کے تعاون سے ریٹائرڈ ملازمین کے لیے پروف آف لائف سرٹیفکیٹ کے اجرا میں سہولت فراہم کر رہا ہے، جس کا مقصد بالخصوص بزرگ پنشنرز کے لیے اس عمل کو آسان بنانا ہے۔
نادرا حکام کا کہنا ہے کہ اگر کسی پنشنر کا پروف آف لائف سرٹیفکیٹ ستمبر میں جاری نہیں ہوسکا تو اسے پنشن بند کرنے کی وجہ نہیں بنایا جائے گا اور صرف اس بنیاد پر پنشن کی ادائیگی نہیں روکی جائے گی۔
یہ بھی پڑھیں: لاہور میں بغیر ہیلمٹ موٹرسائیکل سواروں کے خلاف سخت کارروائی کا فیصلہ
نادرا کے مطابق یہ وضاحت مسلح افواج کے ریٹائرڈ ملازمین سمیت وفاقی اور صوبائی سرکاری اداروں کے پنشنرز پر بھی لاگو ہوتی ہے۔
ایسے اداروں کے ریٹائرڈ ملازمین بھی متاثر نہیں ہوں گے جنہوں نے ابھی تک پروف آف لائف سرٹیفکیٹ کے اجرا کے لیے نادرا کے ساتھ انتظامات مکمل نہیں کیے۔
نادرا کے پبلک انفارمیشن آفیسر نے واضح کیا کہ کسی بھی ادارے کے ریٹائرڈ ملازم کی پنشن صرف اس وجہ سے بند نہیں کی جائے گی کہ نادرا کی جانب سے اس کا پروف آف لائف سرٹیفکیٹ مقررہ مدت تک جاری نہیں ہوسکا۔
نادرا کا کہنا ہے کہ پروف آف لائف سرٹیفکیٹ کے اجرا کی سہولت کا مقصد بزرگ پنشنرز کو بار بار مختلف دفاتر کے چکر لگانے کی زحمت سے بچانا اور پنشن کے عمل کو آسان بنانا ہے۔
