ماسکو: فوجی طیارہ خوفناک حادثے کا شکار، 6 افراد ہلاک
روسی وزارت دفاع کے مطابق حادثہ امور ریجن میں پیش آیا، جہاں ٹی یو-95 طیارہ تربیتی پرواز انجام دے رہا تھا، طیارہ پرواز کے دوران ایک غیر آباد علاقے میں گر کر تباہ ہوا، جس کے باعث زمین پر موجود افراد کو نقصان نہیں پہنچا۔
وزارت دفاع کے مطابق ابتدائی معلومات میں بتایا گیا ہے کہ طیارے میں موجود عملے کے 6 افراد جان کی بازی ہار گئے جبکہ ایک رکن زخمی ہوا، جسے فوری طور پر طبی مرکز منتقل کردیا گیا۔
روسی حکام نے بتایا کہ حادثے کے وقت طیارہ کسی قسم کا اسلحہ یا گولہ بارود لے کر پرواز نہیں کر رہا تھا، حادثے کی وجوہات فوری طور پر معلوم نہیں ہوسکیں اور واقعے کی تحقیقات شروع کردی گئی ہیں۔
روسی فضائیہ کی ایک تحقیقاتی ٹیم کو جائے حادثہ کی جانب روانہ کیا گیا ہے تاکہ طیارہ گرنے کی وجوہات اور حادثے سے متعلق دیگر حالات کا جائزہ لیا جاسکے۔
رپورٹس کے مطابق حادثہ روس کے مشرقی حصے میں چین کی سرحد کے قریب واقع امور ریجن میں پیش آیا۔ علاقائی حکام کے مطابق طیارہ آبادی سے دور گرا، جبکہ پائلٹس نے ممکنہ طور پر طیارے کو رہائشی علاقوں سے دور رکھنے کی کوشش کی۔
یہ بھی پڑھیں:قطری ثالثی میں امریکا ایران مذاکرات بے نتیجہ ختم
واضح رہے کہ ٹی یو-95 روس کا طویل فاصلے تک پرواز کرنے والا اسٹریٹجک بمبار طیارہ ہے، جو کئی دہائیوں سے روسی فضائیہ میں استعمال ہورہا ہے۔ حادثے کے بعد طیارے کے گرنے کی اصل وجہ جاننے کے لیے تحقیقات جاری ہیں۔
