ہیلی کاپٹر گر کر تباہ،تمام سوار جان کی بازی ہار گئے
حادثہ کیوبیک کے علاقے سینٹ بریجید-ڈی آئیبرویل میں پیش آیا، جو مونٹریال شہر سے تقریباً 50 کلومیٹر جنوب مشرق میں واقع ہے۔ پولیس کے مطابق ہیلی کاپٹر دوپہر تقریباً ڈھائی بجے اچانک زمین پر گر گیا، جس کے بعد اس میں آگ بھڑک اٹھی۔
حادثے کے وقت ہیلی کاپٹر میں مجموعی طور پر چار افراد سوار تھے، امدادی ٹیموں کے جائے حادثہ پر پہنچنے تک چاروں افراد جان کی بازی ہار چکے تھے۔ حادثے کے بعد علاقے میں امدادی کارروائیاں کی گئیں جبکہ جائے وقوعہ کو تحقیقات کے لیے محفوظ کرلیا گیا۔
ابتدائی معلومات کے مطابق حادثے کا شکار ہونے والا ہیلی کاپٹر نجی ملکیت تھا، تاہم اس حوالے سے مزید تفصیلات فراہم نہیں کی گئیں۔
یہ بھی پڑھیں:جمہوریہ کانگو میں فوجی طیارہ گر کر تباہ ہوگیا، 14 افراد ہلاک
پولیس نے بتایا کہ حادثے میں ہلاک ہونے والے افراد کی شناخت فوری طور پر جاری نہیں کی گئی۔ متعلقہ اداروں کی جانب سے متاثرین کی شناخت اور دیگر تفصیلات جمع کرنے کا عمل جاری ہے۔
