جنگ جلد ختم ہو جائے گی، ڈونلڈ ٹرمپ
ان کے بیان نے ایک بار پھر خطے کی بدلتی ہوئی صورتحال اور ممکنہ سفارتی پیش رفت پر توجہ مرکوز کر دی ہے۔
امریکی صدر نے میڈیا سے گفتگو کرتے ہوئے کہا کہ وہ خود بھی ایران کے ساتھ جاری مذاکرات میں شریک ہیں اور معاملات درست سمت میں آگے بڑھ رہے ہیں۔
ان کا کہنا تھا کہ آبنائے ہرمز اس وقت کھلی ہوئی ہے اور امریکا کے کنٹرول میں ہے، خطے میں امن و استحکام کیلئے سفارتی کوششیں جاری ہیں۔
ڈونلڈ ٹرمپ نے اس موقع پر کہا کہ امریکا کے پاس گولہ بارود اور دفاعی وسائل کی بڑی مقدار موجود ہے اور ملک کسی بھی ممکنہ صورتحال سے نمٹنے کی مکمل صلاحیت رکھتا ہے، امریکا اپنے مفادات اور اتحادیوں کے تحفظ کیلئے ہر ضروری قدم اٹھائے گا۔
دوسری جانب عرب میڈیا کی رپورٹس میں دعویٰ کیا گیا ہے کہ امریکا، اسرائیل اور ایران کے درمیان جنگ بندی کیلئے جاری سفارتی کوششیں تاحال تعطل کا شکار ہیں، مختلف سفارتی رابطوں کے باوجود کسی حتمی پیش رفت کی تصدیق نہیں ہو سکی۔
ادھر ایرانی حکام نے ملک بھر خصوصاً دارالحکومت تہران میں داخلی سیکیورٹی مزید سخت کر دی ہے۔ حساس مقامات پر نگرانی بڑھا دی گئی ہے جبکہ سیکیورٹی ادارے ہائی الرٹ پر ہیں۔
یہ بھی پڑھیں:ایران سے نمٹنے کیلیے امریکا ہر ہتھیار استعمال کریگا: جے ڈی وینس
تجزیہ کاروں کے مطابق خطے کی صورتحال اب بھی غیر یقینی ہے اور آئندہ چند روز میں ہونے والی سفارتی پیش رفت اس بحران کے مستقبل کا تعین کرنے میں اہم کردار ادا کر سکتی ہے۔
