ایران کا اُردن میں امریکی فوجی اڈے کو تباہ کرنے کا دعویٰ
ایرانی میڈیا کے مطابق پاسدارانِ انقلاب نے اپنے بیان میں کہا کہ یہ کارروائی حالیہ امریکی حملوں کے ردعمل میں کی گئی، جس کا مقصد امریکی فوجی تنصیبات کو نشانہ بنانا تھا۔
بیان میں دعویٰ کیا گیا کہ کارروائی کے دوران امریکی فوجی اڈے کے اہم کمانڈ اینڈ کنٹرول نظام اور ڈرون ہینگر کو نقصان پہنچایا گیا۔
ایرانی حکام نے یہ بھی الزام عائد کیا کہ امریکی فوج نے آبنائے ہرمز کے جنوب میں غیر قانونی راستے پر متعدد بحری جہازوں کو اشتعال دلانے کی کوشش کی، تاہم ایرانی بحری افواج نے بروقت اور مؤثر ردعمل دے کر صورتحال کو قابو میں رکھا۔
بیان کے مطابق اس کے بعد امریکی فوج نے جنوبی ایران کے ساحلی علاقوں میں موجود بعض ساحلی اڈوں اور ٹیلی کمیونی کیشن ٹاورز کو فضائی حملوں میں نشانہ بنایا، جس کے جواب میں ایرانی افواج نے فوری کارروائی کرتے ہوئے جوابی حملے کیے۔
دوسری جانب امریکی حکام کی جانب سے ایرانی دعوؤں پر فوری طور پر کوئی باضابطہ ردعمل سامنے نہیں آیا، جبکہ آزاد ذرائع سے بھی ان دعوؤں کی تصدیق نہیں ہو سکی ہے۔
یہ بھی پڑھیں:شہید آیت اللہ علی خامنہ ای کی آخری آرام گاہ کی پہلی تصویر سامنے آگئی
تجزیہ کاروں کا کہنا ہے کہ ایران اور امریکہ کے درمیان حالیہ کشیدگی کے باعث مشرقِ وسطیٰ میں صورتحال انتہائی حساس ہو چکی ہے، دونوں ممالک کی جانب سے سامنے آنے والے دعوؤں کی آزادانہ تصدیق نہ ہونے کے باعث صورتحال پر عالمی برادری کی گہری نظر ہے۔
