چھوٹا طیارہ گر کر تباہ، ریسکیو آپریشن شروع
واقعے کے بعد علاقے میں ہنگامی صورتحال پیدا ہوگئی جبکہ پولیس اور دیگر متعلقہ ادارے جائے وقوعہ پر پہنچ گئے۔
امریکی میڈیا رپورٹس کے مطابق نیویارک پولیس ڈیپارٹمنٹ نے تصدیق کی ہے کہ حادثہ دن میں پیش آیا، جب ایک چھوٹا طیارہ نامعلوم وجوہات کی بنا پر اپنا توازن کھو بیٹھا اور ایسٹ ریور میں گر کر تباہ ہو گیا۔
حکام کے مطابق طیارے میں سوار متعدد افراد زخمی ہوئے ہیں، تاہم زخمیوں کی حتمی تعداد یا ان کی حالت کے بارے میں فوری طور پر کوئی سرکاری تفصیلات جاری نہیں کی گئیں۔
امدادی ٹیموں نے دریا میں سرچ اینڈ ریسکیو آپریشن شروع کر دیا ہے، جبکہ غوطہ خور اور دیگر ہنگامی اہلکار متاثرین کو محفوظ مقام پر منتقل کرنے میں مصروف ہیں۔
پولیس نے احتیاطی تدابیر کے طور پر حادثے کے مقام کے اطراف کا علاقہ گھیرے میں لے لیا ہے تاکہ امدادی کارروائیوں میں کسی قسم کی رکاوٹ نہ آئے۔ ابتدائی اطلاعات کے مطابق حادثے کی وجہ تاحال معلوم نہیں ہو سکی۔
یہ بھی پڑھیں:کابل یونیورسٹی کے طلبہ ہاسٹل میں دھماکہ، 20 طلبہ زخمی
امریکی حکام کا کہنا ہے کہ طیارے کے بلیک باکس اور دیگر شواہد کا جائزہ لے کر یہ معلوم کیا جائے گا کہ حادثہ تکنیکی خرابی، خراب موسم یا کسی اور وجہ سے پیش آیا۔
