آیت اللہ خامنہ ای کو خراجِ عقیدت، تعزیتی تقریبات کا شیڈول جاری
دنیا بھر سے آنے والے سرکاری وفود، مذہبی شخصیات اور عوام کی بڑی تعداد مرحوم رہنما کو خراجِ عقیدت پیش کر رہی ہے۔ حسینیہ میں سوگ کی فضا قائم ہے اور تعزیتی تقریبات میں غیر معمولی شرکت دیکھنے میں آ رہی ہے۔
ایرانی میڈیا کے مطابق آیت اللہ علی خامنہ ای کے جسدِ خاکی کے ساتھ ان کے خاندان کے چار دیگر شہدا کے تابوت بھی رکھے گئے ہیں۔
یاد رہے کہ 28 فروری کو ہونے والے حملے میں ان کی اہلیہ، داماد، ایک بہو اور دو سالہ نواسی بھی جاں بحق ہوئے تھے، جنہیں مشترکہ طور پر خراجِ عقیدت پیش کیا جا رہا ہے۔
دوسری جانب ایرانی حکومت نے آیت اللہ خامنہ ای کی تعزیتی تقریبات کا سرکاری شیڈول بھی جاری کر دیا ہے۔ اعلان کے مطابق 4 جولائی سے تہران میں چھ روزہ سوگ اور مختلف تعزیتی تقریبات کا آغاز ہوگا، جبکہ 6 جولائی کو دارالحکومت کی مرکزی شاہراہوں پر نمازِ جنازہ اور جنازے کا مرکزی جلوس نکالا جائے گا۔
رپورٹس کے مطابق 7 جولائی کو جسدِ خاکی کو تہران سے مقدس شہر قم منتقل کیا جائے گا، اس کے بعد 8 جولائی کو عراق کے مقدس شہروں نجف اور کربلا میں خصوصی تعزیتی تقریبات منعقد ہوں گی، جبکہ 9 جولائی کو جسدِ خاکی دوبارہ ایران لایا جائے گا اور اسی روز مشہد میں تدفین کی جائے گی۔
یہ بھی پڑھیں:امریکا میں دورانِ پرواز چھوٹا طیارہ گر کر تباہ
ایرانی حکام کا کہنا ہے کہ دنیا کے تقریباً 90 ممالک کے سربراہان، نمائندے اور مذہبی شخصیات ان تقریبات میں شرکت کریں گے، جس کے باعث سیکیورٹی کے انتہائی سخت انتظامات کیے گئے ہیں اور تمام تقریبات کو عالمی اہمیت کا حامل قرار دیا جا رہا ہے۔
