سعودی عرب میں خوفناک ٹریفک حادثہ، پاکستانی باپ بیٹوں سمیت جاں بحق
حادثے کے نتیجے میں باپ اور اس کے دو جوان سالہ بیٹے جاں بحق ہوگئے۔
ذرائع کے مطابق جاں بحق ہونے والوں کی شناخت چوہدری واحد علی اور ان کے دو بیٹوں عمر واحد اور علی واحد کے نام سے ہوئی ہے۔ تینوں افراد عمرہ کی ادائیگی کے سلسلے میں سعودی عرب میں موجود تھے اور گاڑی میں مکہ مکرمہ سے مدینہ منورہ جا رہے تھے کہ راستے میں انہیں حادثہ پیش آگیا۔
حادثے کی خبر سامنے آنے کے بعد عارف والا میں سوگ کی فضا پھیل گئی، جاں بحق ہونے والے تینوں افراد کا تعلق پنجاب کے شہر عارف والا سے تھا اور وہ محلہ اقبال نگر کے رہائشی تھے۔
حادثے میں باپ اور دونوں بیٹوں کی موت نے اہلِ خانہ اور عزیز و اقارب کو گہرے صدمے سے دوچار کردیا ہے۔ ایک ہی خاندان کے تین افراد کی اچانک موت کی خبر سے علاقے میں بھی افسوس کا اظہار کیا جا رہا ہے۔
ذرائع کا کہنا ہے کہ تینوں جاں بحق افراد کی میتیں پاکستان منتقل کرنے کی تیاریاں کی جا رہی ہیں تاکہ انہیں آبائی علاقے عارف والا پہنچایا جا سکے اور اہلِ خانہ اپنے پیاروں کی آخری رسومات ادا کرسکیں۔
یہ بھی پڑھیں:مریم اورنگزیب کی ساس خالقِ حقیقی سے جاملیں
تاہم حادثے کی وجوہات، گاڑی کو پیش آنے والے واقعے کی تفصیلات اور دیگر ممکنہ متاثرین سے متعلق مزید معلومات تاحال سامنے نہیں آئیں۔
سعودی عرب میں پیش آنے والا یہ افسوسناک واقعہ ایک ہی خاندان کے تین افراد کی جان لے گیا، جس کے باعث ان کے اہلِ خانہ اور عزیز و اقارب شدید غم میں مبتلا ہیں۔
