لرنر پرمٹ پر ڈرائیونگ کی اجازت نہیں، ٹریفک پولیس
سٹی ٹریفک پولیس نے آج اور کل شہر بھر میں کم عمر ڈرائیورز، بغیر لائسنس گاڑی چلانے والوں، بغیر ہیلمٹ موٹرسائیکل سواروں اور ون وے کی خلاف ورزی کرنے والوں کیخلاف جنرل ہولڈ اپ کا اعلان کردیا۔
سی ٹی او لاہور کے مطابق کم عمر ڈرائیورز کے چالان کے ساتھ ان کی گاڑی یا موٹرسائیکل بھی بند کی جائے گی، تاہم کم عمر موٹرسائیکل سوار کی جانب سے جووینائل پرمٹ پیش کرنے کی صورت میں موٹرسائیکل چھوڑ دی جائے گی۔
حکام کے مطابق ون وے ٹریفک کی خلاف ورزی پر پہلے مرحلے میں چالان کیا جائے گا، جبکہ بار بار قانون توڑنے والوں کے خلاف مقدمہ درج کیا جائے گا۔
سی ٹی او لاہور نے واضح کیا کہ لرنر پرمٹ پر گاڑی چلانے کی ہرگز اجازت نہیں، بغیر لائسنس گاڑی چلانے پر 5 ہزار روپے جبکہ موٹرسائیکل چلانے پر 2 ہزار روپے جرمانہ عائد کیا جائے گا اور گاڑی بھی بند کردی جائے گی۔
ٹریفک پولیس کے مطابق ہفتہ اور اتوار کے روز کم عمر افراد کے موٹرسائیکل، گاڑی اور رکشہ لے کر سڑکوں پر آنے کے واقعات کے پیش نظر کارروائی کی جائے گی، موٹرسائیکل پر تین افراد کے سوار ہونے پر بھی ایکشن لیا جائے گا۔
یہ بھی پڑھیں:سہیل آفریدی علی امین گنڈا پور کے گھر پہنچ گئے
دوسری جانب لائسنس دفاتر کے باہر بھی خصوصی ہولڈ اپ کیا جائے گا، جہاں شہریوں کو موٹرسائیکل کا لائسنس بنوانے کی سہولت فراہم کی جائے گی۔
سی ٹی او لاہور سید عبدالرحیم شیرازی نے سرکل افسران کو اپنی نگرانی میں کریک ڈاؤن یقینی بنانے کی ہدایت کردی ہے۔
