پیپلز پارٹی کے عثمان اعوان مسلم لیگ میں شامل
تفصیلات کے مطابق مولانا شعیب اور عثمان اعوان نے مسلم لیگ کے رہنما چوہدری سالک حسین سے ملاقات کی، جس کے دوران دونوں رہنماؤں نے مسلم لیگ میں شمولیت کا اعلان کیا۔
اس موقع پر مولانا شعیب کا کہنا تھا کہ وہ چوہدری شجاعت حسین کی وضع داری اور رواداری کی سیاست سے متاثر ہوکر مسلم لیگ میں شامل ہوئے ہیں۔ مسلم لیگ محب وطن جماعت ہے اور وہ ملکی و قومی مفاد کے لیے اپنا کردار ادا کرتے رہیں گے۔
چوہدری سالک حسین نے مولانا شعیب اور عثمان اعوان کی مسلم لیگ میں شمولیت کا خیرمقدم کرتے ہوئے کہا کہ علماء اور نوجوانوں کی جماعت میں شمولیت خوش آئند ہے۔ انہوں نے کہا کہ مزید صوبوں اور انتظامی یونٹس کا قیام وقت کی اہم ضرورت ہے۔
یہ بھی پڑھیں: سہیل آفریدی کی ناصر عباس اور محمود خاں اچکزئی سےاہم ملاقات
ان کا کہنا تھا کہ نئے انتظامی یونٹس کے قیام سے حکومت اور عوام کے درمیان فاصلہ کم ہوگا، جبکہ انتظامی یونٹس میں اضافے سے وسائل کی منصفانہ تقسیم اور پسماندہ علاقوں کی ترقی کا عمل تیز ہوگا۔
چوہدری سالک حسین نے کہا کہ مسلم لیگ نئے صوبوں کے قیام کے حوالے سے اقدامات کی مکمل حمایت کرتی ہے اور نئے صوبوں و انتظامی یونٹس کے لیے بھرپور سیاسی اور عوامی مہم چلائی جائے گی۔
انہوں نے کہا کہ نوجوانوں کی سیاسی تربیت اور مثبت سیاسی کردار وقت کی اہم ضرورت ہے، گالم گلوچ اور تنگ نظری کو سیاست نہیں کہا جاسکتا، مسلم لیگ تہذیب، رواداری، برداشت اور تکریم کی سیاست پر یقین رکھتی ہے۔
اس موقع پر مسلم لیگ خیبر پختونخوا کے رہنما انتخاب خان چمکنی نے کہا کہ علماء اور نوجوانوں کی شمولیت سے مسلم لیگ خیبر پختونخوا میں مزید مضبوط ہوگی اور صوبے کے عوام کی مؤثر آواز بنے گی۔
انتخاب خان چمکنی کا کہنا تھا کہ چوہدری سالک حسین کی قیادت میں مسلم لیگ مضبوط سیاسی و پارلیمانی قوت بنے گی۔
