مسافر کوچ الٹنے سے 6 افراد جاں بحق، متعدد زخمی
ریسکیو حکام کے مطابق افسوسناک حادثہ کندھ کوٹ کے سوکر موڑ کے قریب پیش آیا، جہاں تیز رفتاری کے باعث مسافر کوچ بے قابو ہوکر الٹ گئی۔ حادثے کے نتیجے میں کوچ میں سوار متعدد افراد زخمی ہوئے جبکہ 6 افراد موقع پر ہی جان کی بازی ہار گئے۔
حادثے کی اطلاع ملتے ہی ریسکیو ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کردیں۔ ریسکیو اہلکاروں نے حادثے میں جاں بحق افراد کی لاشوں اور زخمیوں کو کوچ سے نکال کر قریبی اسپتالوں میں منتقل کیا۔
جاں بحق افراد اور زخمیوں کو تعلقہ اسپتال تنگوانی اور تعلقہ اسپتال ٹھل منتقل کردیا گیا ہے، جہاں زخمیوں کو طبی امداد فراہم کی جارہی ہے۔
ڈپٹی کمشنر کے مطابق حادثے میں شدید زخمی ہونے والے افراد کی حالت کے پیش نظر انہیں سکھر منتقل کرنے کے انتظامات بھی کیے جارہے ہیں، تاکہ انہیں بہتر طبی سہولیات فراہم کی جاسکیں۔
حادثے کے بعد انڈس ہائی وے پر کچھ دیر کیلئے ٹریفک کی روانی بھی متاثر ہوئی، حادثے کی وجوہات جاننے کیلئے مزید معلومات اکٹھی کی جارہی ہیں۔
یہ بھی پڑھیں:قاتلانہ حملے میں بی اے پی رہنما عبدالرحمان لانگو جاں بحق
مسافر کوچ حادثے کے بعد علاقے میں فضا سوگوار ہوگئی، جبکہ جاں بحق افراد کے اہلخانہ غم سے نڈھال ہیں۔
