یوم دفاع و شہدائے پاکستان: مزار قائد پر گارڈز کی تبدیلی کی پروقار تقریب
تقریب کے مہمان خصوصی ایئر وائس مارشل حسن فیصل تھے، جنہوں نے مزار قائد پر حاضری دی اور بابائے قوم قائداعظم محمد علی جناح کو خراج عقیدت پیش کیا۔ اس موقع پر پاکستان ایئر فورس کے چاق و چوبند دستے نے قومی جذبے کے ساتھ گارڈز کی ذمہ داریاں سنبھالیں۔
گارڈز کی تبدیلی کی تقریب میں قومی جذبے سے سرشار ماحول دیکھنے میں آیا، جبکہ شرکا نے وطن عزیز کے دفاع کیلئے جانوں کا نذرانہ پیش کرنے والے شہدا کو خراج عقیدت پیش کیا۔
ملک بھر میں آج یوم دفاع و شہدائے پاکستان منایا جا رہا ہے۔ یہ دن ہر سال 6 ستمبر کو 1965 کی جنگ میں پاک فوج اور پاکستانی قوم کی جانب سے دکھائی جانے والی بہادری اور عزم کی یاد میں منایا جاتا ہے۔
61 برس قبل پاک فوج اور پاکستانی قوم نے رات کی تاریکی میں حملہ کرنے والے دشمن کیخلاف بھرپور مزاحمت کرتے ہوئے وطن کا دفاع کیا۔ قومی تاریخ کا یہ دن دفاع وطن کیلئے اتحاد، قربانی اور عزم کی علامت سمجھا جاتا ہے۔
پاکستانی قوم آج کے دن شہدا کی لازوال قربانیوں کو یاد کرتے ہوئے اس عزم کا اعادہ کرتی ہے کہ ملک کی سلامتی، خودمختاری اور دفاع کیلئے کسی بھی قربانی سے دریغ نہیں کیا جائے گا۔
یہ بھی پڑھیں:پاسپورٹ ڈیلیوری کاؤنٹرز ہر ہفتے کے روزکھولنے کا اعلان
گزشتہ برس مئی میں بھی پاکستانی قوم اور مسلح افواج نے دشمن کے مقابلے میں اپنے عزم اور دفاعی صلاحیتوں کا مظاہرہ کرتے ہوئے اسی جذبے کو ایک بار پھر زندہ کیا۔
