پی آئی اے کی پرواز میں آگ لگ گئی، ہنگامی لینڈنگ
واقعے کے باعث ایئرپورٹ پر ہنگامی اقدامات کیے گئے جبکہ طیارے میں سوار 130 مسافروں کو بحفاظت لاؤنج منتقل کردیا گیا۔
رپورٹس کے مطابق ٹورنٹو ایئرپورٹ سے کراچی کیلئے روانہ ہونے والی پی آئی اے کی پرواز پی کے 784 نے ٹیک آف کیا ہی تھا کہ کچھ دیر بعد طیارے کے پینل پر آگ کی نشاندہی کرنے والے سگنلز موصول ہوئے۔
صورتحال کی سنگینی کو دیکھتے ہوئے طیارے کے عملے نے فوری طور پر آگ کی موجودگی کی تصدیق کی، جس کے بعد کپتان نے ٹورنٹو ایئرپورٹ کے ایئر ٹریفک کنٹرول سے رابطہ کرکے ہنگامی لینڈنگ کی اجازت طلب کی۔
رپورٹ کے مطابق طیارے کے کارگو ہولڈ میں آگ لگنے کی اطلاع ملنے کے بعد پائلٹ نے طیارے کا رخ دوبارہ ٹورنٹو ایئرپورٹ کی جانب موڑ دیا، پرواز نے ٹیک آف کے تقریباً 12 منٹ بعد ٹورنٹو ایئرپورٹ پر ہنگامی لینڈنگ کی۔
مسافروں سے بھرے طیارے میں آگ لگنے کی اطلاع ملتے ہی ایئرپورٹ پر ہنگامی حالت نافذ کردی گئی۔ فائر بریگیڈ، ریسکیو ٹیموں اور دیگر متعلقہ عملے کو فوری طور پر رن وے پر تعینات کردیا گیا تاکہ کسی بھی ممکنہ صورتحال سے نمٹا جاسکے۔
ہنگامی لینڈنگ مکمل ہونے کے فوراً بعد فائر بریگیڈ کے عملے نے طیارے کے کارگو ہولڈ کا معائنہ شروع کردیا اور آگ لگنے کی وجوہات کا جائزہ لیا جا رہا ہے۔
یہ بھی پڑھیں:عالمی منڈی میں خام تیل کی قیمتیں بڑھ گئیں
طیارے میں مجموعی طور پر 130 مسافر سوار تھے، جنہیں ہنگامی لینڈنگ کے بعد طیارے سے بحفاظت نکال کر ایئرپورٹ کے لاؤنج منتقل کردیا گیا۔
پرواز پی کے 784 نے پیر کی دوپہر کراچی ایئرپورٹ پہنچنا تھا، تاہم واقعے کے باعث پرواز کا شیڈول متاثر ہوگیا۔
