پنجاب کے سرکاری سکولوں میں اے آئی کی تعلیم لازمی قرار
حکومت پنجاب کے مطابق تعلیمی نظام میں مصنوعی ذہانت کی تعلیم شامل کرنے سے طلبہ کو اس جدید ٹیکنالوجی کے بنیادی تصورات اور عملی استعمال سے آگاہی حاصل ہوگی۔ اس اقدام کا مقصد نئی نسل میں ٹیکنالوجی سے متعلق بنیادی مہارتوں کے فروغ کے ساتھ ساتھ تنقیدی سوچ اور مسائل حل کرنے کی صلاحیت کو بھی بہتر بنانا ہے۔
حکام کے مطابق ڈیجیٹل اصلاحات کے تحت سرکاری سکولوں میں کمپیوٹر لیبز کو جدید بنانے اور طلبہ کو ضروری سہولیات فراہم کرنے پر بھی توجہ دی جارہی ہے۔ جدید کمپیوٹر لیبز کے ذریعے طلبہ کو مصنوعی ذہانت سمیت دیگر ڈیجیٹل شعبوں میں عملی تجربہ حاصل کرنے کے مواقع فراہم کیے جائیں گے۔
اے آئی کی تعلیم کو مؤثر بنانے کیلئے اساتذہ کی تربیت کا انتظام بھی کیا جائے گا، تربیتی پروگرامز کے ذریعے اساتذہ کو مصنوعی ذہانت کے بنیادی اصولوں، جدید ٹیکنالوجی اور مختلف شعبوں میں اس کے عملی استعمال سے آگاہ کیا جائے گا تاکہ وہ طلبہ کو بہتر انداز میں تعلیم دے سکیں۔
حکومت پنجاب کا کہنا ہے کہ مصنوعی ذہانت کو نصاب کا حصہ بنانے کا بنیادی مقصد طلبہ کو مستقبل کی ملازمتوں اور ٹیکنالوجی پر مبنی معیشت کیلئے تیار کرنا ہے۔
واضح رہے کہ دنیا بھر میں مصنوعی ذہانت تیزی سے مختلف شعبوں کا حصہ بن رہی ہے، اس لیے طلبہ کو ابتدائی تعلیمی مراحل ہی سے جدید ٹیکنالوجی سے روشناس کرانا ضروری ہے۔
یہ بھی پڑھیں:سہیل آفریدی 5 سالہ آیت نور کے گھر پہنچ گئے
اس اقدام سے پنجاب کے سرکاری تعلیمی اداروں میں ڈیجیٹل تعلیم کے فروغ اور طلبہ کی جدید ٹیکنالوجی تک رسائی میں بہتری کی توقع ہے، حکومت کا ہدف نئی نسل کو مستقبل کے چیلنجز اور مواقع کیلئے زیادہ بہتر طور پر تیار کرنا ہے۔
