مریم نواز کا مون سون کے بعد پنجاب بھر میں خستہ حال عمارتوں کے سروے کا حکم
وزیراعلیٰ مریم نواز شریف کی زیر صدارت پنجاب ڈویلپمنٹ پروگرام (PDP) فیز ون اور مون سون کے دوران نکاسی آب کی صورتحال کا جائزہ لینے کے لیے اجلاس ہوا، جس میں صوبے کے مختلف شہروں میں جاری ترقیاتی منصوبوں اور بارشوں کے دوران انتظامیہ کی کارکردگی کا جائزہ لیا گیا۔
اجلاس میں وزیراعلیٰ نے پنجاب ڈویلپمنٹ پروگرام فیز ون کی جلد تکمیل کا حکم دیتے ہوئے پی ڈی پی فیز ون کی کیس اسٹڈی اور عوامی فیڈ بیک مرتب کرنے کی بھی ہدایت کی۔
اجلاس کو بریفنگ میں بتایا گیا کہ پنجاب کے 29 شہروں میں انڈر گراؤنڈ سٹوریج ٹینک فنکشنل ہوچکے ہیں جبکہ مزید 21 شہروں میں ان کی تعمیر جاری ہے۔ وزیراعلیٰ نے ساہیوال، فیصل آباد، ملتان، گوجرانوالہ، شیخوپورہ، ننکانہ صاحب، راولپنڈی اور سیالکوٹ میں جاری منصوبوں سے متعلق تفصیلی رپورٹ بھی طلب کرلی۔
مریم نواز شریف نے بورے والا، تاندلیانوالہ، جڑانوالہ، جلال پور جٹاں، سمبڑیال، کبیروالا، چک جھمرہ، بھلوال، اٹک، وزیرآباد، ٹوبہ ٹیک سنگھ، کمالیہ اور بہاولنگر میں پنجاب ڈویلپمنٹ پروگرام کے منصوبوں کا بھی جائزہ لیا۔
وزیراعلیٰ نے لاہور اور گوجرانوالہ کے ڈپٹی کمشنرز کیپٹن (ر) علی اعجاز اور نوید احمد شیخ کی کارکردگی کو سراہتے ہوئے انہیں شاباش دی۔
مریم نواز شریف نے کہا کہ بارشوں کے دوران عوام کی سہولت کے لیے دن رات ایک کرنے والے افسران اور اہلکار شاباش کے مستحق ہیں۔ مون سون کے دوران ڈپٹی کمشنرز، اسسٹنٹ کمشنرز، واسا اور ستھرا پنجاب نے عمدہ کارکردگی کا مظاہرہ کیا۔
انہوں نے کہا کہ مختلف شہروں میں نئے سیوریج سسٹم کی تکمیل کے بعد نکاسی آب کی صورتحال میں واضح بہتری آئی ہے۔ وزیراعلیٰ نے متعلقہ حکام کو ہدایت کی کہ سیوریج اور ڈرینج منصوبوں کے اثرات کا تفصیلی جائزہ لے کر رپورٹ پیش کی جائے تاکہ مستقبل میں شہریوں کو بارش کے دوران مزید بہتر سہولیات فراہم کی جاسکیں۔
