مون سون کا پانچواں اسپیل کل سے شروع ہونے کا امکان
پی ڈی ایم اے کے مطابق بارشوں کا نیا سلسلہ پنجاب کے مختلف اضلاع کو متاثر کر سکتا ہے، جس کے باعث ممکنہ خطرات سے نمٹنے کیلئے احتیاطی اقدامات کی ہدایت کی گئی ہے۔
پی ڈی ایم اے کی جانب سے جاری کردہ رپورٹس میں کہا گیا کہ مون سون کے نئے اسپیل کے دوران نشیبی علاقوں میں اربن فلڈنگ، ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ہے۔ ضلعی انتظامیہ اور متعلقہ اداروں کو ہدایت کی گئی ہے کہ وہ صورتحال پر نظر رکھیں اور کسی بھی ہنگامی صورتحال سے نمٹنے کے لیے تیار رہیں۔
دوسری جانب لاہور سمیت پنجاب کے مختلف علاقوں میں بارشوں کے باعث موسم خوشگوار ہو گیا ہے۔ سرگودھا، چنیوٹ، ملتان، فیصل آباد اور دیگر شہروں میں کہیں ہلکی جبکہ کہیں تیز بارش ریکارڈ کی گئی، جس سے گرمی کی شدت میں کمی آئی۔
ادھر خیبرپختونخوا میں جاری مون سون بارشوں نے مختلف علاقوں میں مشکلات پیدا کر دی ہیں۔ فلیش فلڈ، گھروں کی چھتیں اور دیواریں گرنے کے واقعات میں 9 افراد جاں بحق جبکہ 7 افراد زخمی ہوئے ہیں۔ بارشوں کے باعث 103 مکانات کو بھی نقصان پہنچنے کی اطلاعات ہیں۔
یہ بھی پڑھیں:پنجاب پولیس کی یونیفارم میں بڑی تبدیلی کا فیصلہ
حکام کے مطابق متاثرہ علاقوں میں امدادی سرگرمیاں جاری ہیں، جبکہ ضلعی انتظامیہ اور ریسکیو ادارے صورتحال کی نگرانی کر رہے ہیں۔
محکمہ موسمیات اور پی ڈی ایم اے نے شہریوں کو احتیاطی تدابیر اختیار کرنے، غیر ضروری سفر سے گریز کرنے اور بارش کے دوران ندی نالوں اور نشیبی علاقوں سے دور رہنے کی ہدایت کی ہے۔
