پنجاب پولیس کی یونیفارم میں بڑی تبدیلی کا فیصلہ
پولیس حکام کے مطابق رواں مالی سال میں تیار کی جانے والی یونیفارمز کے بیجز، کیپ، بیری، میڈلز، پاکٹس اور نام پلیٹس ایک ہی ڈیزائن اور پیٹرن کے مطابق بنائی جائیں گی۔ تاہم مختلف یونٹس کے یونیفارم کا بنیادی رنگ برقرار رہے گا، جبکہ اوپر استعمال ہونے والی تمام اسیسریز ایک جیسی ہوں گی۔
حکام کا کہنا ہے کہ اس سے قبل پنجاب پولیس کے مختلف شعبے اپنی اپنی ضرورت کے مطابق مختلف انداز کے یونیفارمز تیار کروا رہے تھے، جس کے باعث یکسانیت کا فقدان تھا۔ نئے فیصلے کے بعد تمام یونٹس میں یونیفارم کے معیار اور ڈیزائن کو ایک جیسا رکھا جائے گا۔
پولیس حکام کے مطابق رواں مالی سال میں 2 لاکھ 53 ہزار یونیفارمز خریدی جائیں گی، جن میں ضلعی پولیس، پنجاب ہائی وے پٹرول (پی ایچ پی)، ٹریفک پولیس، ایلیٹ فورس، اسپیشل پروٹیکشن یونٹ (ایس پی یو)، ریلوے پولیس اور دیگر یونٹس شامل ہیں۔
حکام کے مطابق ضلعی پولیس کے لیے اولیو گرین رنگ کی سوا لاکھ سے زائد یونیفارمز خریدی جائیں گی۔ یونیفارم کی خریداری کیلئے رواں سال بجٹ میں تقریباً 2 ارب روپے مختص کیے گئے ہیں، جبکہ تمام یونٹس کے اہلکاروں کیلئے کم از کم ایک یونیفارم تیار کروانا لازمی ہوگا۔
یہ بھی پڑھیں:سائیڈ ویو مررز اور انڈیکیٹرز کے بغیر سفر پر اب جرمانہ ہوگا
پولیس حکام نے بتایا کہ 2 لاکھ 53 ہزار یونیفارمز کی خریداری کے لیے رواں ماہ پری کوالیفکیشن کا عمل شروع کر دیا جائے گا۔ گزشتہ سال ضلعی پولیس کے لیے خریدی گئی یونیفارمز میں سے 90 ہزار یونیفارمز موصول ہو چکی ہیں، جن کی تقسیم کا عمل جلد شروع کر دیا جائے گا۔
