خیبرپختونخوا بیوروکریسی کے سینئر افسر نے زندگی کا خاتمہ کر لیا
پولیس کے مطابق گریڈ 18 کے افسر جاوید صنم نے پشاور میں واقع اپنی رہائش گاہ پر خود کو گولی مار کر زندگی کا خاتمہ کیا۔ واقعے کی اطلاع ملتے ہی پولیس اور متعلقہ حکام موقع پر پہنچ گئے اور جائے وقوعہ سے شواہد اکٹھے کیے گئے۔
ابتدائی معلومات کے مطابق سرکاری افسر کے قریبی رشتہ داروں کے ساتھ جائیداد کے تنازعات چل رہے تھے، تاہم پولیس کا کہنا ہے کہ واقعے کی اصل وجوہات جاننے کیلئے مزید تحقیقات جاری ہیں۔
ایس پی کینٹ محمد جنید کھرل نے میڈیا سے گفتگو کرتے ہوئے بتایا کہ ابتدائی طور پر واقعہ خودکشی کا معلوم ہوتا ہے، خودکشی والے کمرے سے اہم شواہد حاصل کیے گئے ہیں، جبکہ پوسٹ مارٹم رپورٹ آنے کے بعد صورتحال مزید واضح ہو سکے گی۔
پولیس حکام کے مطابق تمام پہلوؤں سے تحقیقات کی جا رہی ہیں تاکہ واقعے کی مکمل حقیقت سامنے لائی جا سکے، جائے وقوعہ سے ملنے والے شواہد اور دیگر معلومات کی روشنی میں مزید کارروائی عمل میں لائی جائے گی۔
یہ بھی پڑھیں:قطر کے سابق امیر شیخ حمد بن خلیفہ الثانی خالقِ حقیقی سے جا ملے
جاوید صنم کے انتقال کی خبر کے بعد سرکاری حلقوں میں افسوس کی لہر دوڑ گئی ہے، ساتھی افسران اور متعلقہ افراد نے واقعے پر گہرے دکھ کا اظہار کیا ہے۔
