بشریٰ بی بی کی بیٹی نے جیل انتظامیہ کیخلاف درخواست دائر کردی
عدالت نے درخواست پر کارروائی کرتے ہوئے پراسیکیوشن کو نوٹس جاری کر دیے ہیں۔
تفصیلات کے مطابق درخواست فیصل ملک ایڈووکیٹ کے ذریعے ایڈیشنل ڈسٹرکٹ اینڈ سیشن جج خرم سلیم کی عدالت میں دائر کی گئی۔ عدالت نے پراسیکیوشن سے 16 جولائی تک جواب طلب کرتے ہوئے مزید سماعت اسی تاریخ تک ملتوی کر دی۔
درخواست میں مؤقف اختیار کیا گیا کہ جیل کی خاتون اہلکار مریم نے بشریٰ بی بی کی متعدد شکایات کے باوجود ان کی آنکھ کی تکلیف پر بروقت توجہ نہیں دی، جس کے باعث ان کی طبی حالت مسلسل خراب ہوتی رہی۔
درخواست گزار کے مطابق بشریٰ بی بی نے اپنی آنکھ میں شدید درد اور تکلیف کی کئی مرتبہ شکایت کی، تاہم مناسب طبی سہولت فراہم کرنے میں تاخیر کی گئی۔
درخواست میں کہا گیا کہ بروقت علاج نہ ملنے کے باعث بیماری شدت اختیار کر گئی اور بالآخر انہیں فوری سرجری کروانا پڑی۔
درخواست میں یہ بھی الزام لگایا گیا کہ متعلقہ خاتون اہلکار کا رویہ مسلسل غیر پیشہ ورانہ، توہین آمیز اور غیر انسانی رہا۔ مبشرہ شیخ کے مطابق ان کی والدہ نے جیل انتظامیہ کے سامنے کئی مرتبہ اس اہلکار کے رویے کی شکایت بھی کی، لیکن کوئی مؤثر کارروائی نہیں کی گئی۔
یہ بھی پڑھیں:لیسکو کا ایک لاکھ سے زائد سمارٹ میٹرز لگانے کا فیصلہ
عدالت نے درخواست کو سماعت کیلئے منظور کرتے ہوئے متعلقہ حکام سے جواب طلب کر لیا، دوسری جانب جیل انتظامیہ کی جانب سے تاحال ان الزامات پر کوئی باضابطہ مؤقف سامنے نہیں آیا۔
کیس کی آئندہ سماعت 16 جولائی کو ہوگی، جہاں عدالت پراسیکیوشن کا جواب سننے کے بعد مزید کارروائی کرے گی۔
