اے این پی رہنما ڈاکٹر طارق کے بھائی فائرنگ سے جاں بحق
پولیس کے مطابق فائرنگ کا واقعہ لوی سم باجوڑ کے علاقے میں پیش آیا، جہاں نامعلوم حملہ آوروں نے عبدالرزاق کو نشانہ بنایا۔
فائرنگ کے نتیجے میں وہ شدید زخمی ہو گئے جنہیں فوری طور پر طبی امداد کے لیے قریبی اسپتال منتقل کیا گیا، تاہم وہ جانبر نہ ہو سکے اور زخموں کی تاب نہ لاتے ہوئے دم توڑ گئے۔
واقعے کے بعد علاقے میں خوف و ہراس پھیل گیا جبکہ پولیس کی بھاری نفری جائے وقوعہ پر پہنچ گئی۔
پولیس حکام کے مطابق جائے وقوعہ سے شواہد اکٹھے کر لیے گئے ہیں اور مختلف پہلوؤں سے تفتیش کا آغاز کر دیا گیا ہے، حملہ آور واردات کے بعد موقع سے فرار ہو گئے، جن کی گرفتاری کے لیے علاقے میں سرچ آپریشن کیا جا رہا ہے۔
پولیس کے مطابق ابتدائی طور پر واقعے کی وجوہات سامنے نہیں آ سکیں، تاہم پولیس ذاتی دشمنی، ٹارگٹ کلنگ اور دیگر ممکنہ پہلوؤں پر تحقیقات کر رہی ہے۔
یہ بھی پڑھیں: زیارت میں مسلح افراد کا پولیس چوکی پر حملہ، 9 اہلکار شہید
عبدالرزاق کے جاں بحق ہونے کی خبر پر اہلخانہ، سیاسی کارکنوں اور علاقہ مکینوں میں غم و غصہ پایا جاتا ہے۔
پولیس حکام نے یقین دہانی کرائی ہے کہ واقعے میں ملوث ملزمان کو جلد گرفتار کر کے قانون کے کٹہرے میں لایا جائے گا۔
