اڈیالہ جیل کا قیدی دوران علاج ہسپتال میں دم توڑ گیا
ذرائع کے مطابق متوفی قیدی کی شناخت توصیف کے نام سے ہوئی ہے جو اڈیالہ جیل میں جوڈیشل ریمانڈ پر قید تھا، ملزم توصیف کے خلاف تھانہ مندرہ میں منشیات کا مقدمہ درج تھا اور اسے عدالتی حکم پر جیل منتقل کیا گیا تھا۔
جیل ذرائع کا کہنا ہے کہ قیدی کی طبیعت اچانک خراب ہوئی جس پر جیل کے طبی عملے نے ابتدائی معائنہ کیا، حالت تشویشناک ہونے پر اسے فوری طور پر اڈیالہ جیل سے ڈی ایچ کیو ہسپتال راولپنڈی منتقل کیا گیا جہاں ڈاکٹرز نے اسے طبی امداد فراہم کی۔
ذرائع کے مطابق قیدی کو ہسپتال منتقل کرنے کے بعد اس کا علاج جاری تھا تاہم وہ دورانِ علاج جانبر نہ ہو سکا اور دم توڑ گیا، قیدی کے انتقال کی اطلاع ملتے ہی جیل انتظامیہ نے متعلقہ پولیس اور ورثاء کو آگاہ کر دیا۔
انتقال کے بعد ضروری قانونی کارروائی مکمل کی گئی، پولیس حکام کے مطابق واقعے سے متعلق مزید کارروائی ضابطے کے مطابق جاری ہے۔
یہ بھی پڑھیں: اڈیالہ جیل سے علاج کیلئے ہسپتال لایا گیا قیدی فرار
حکام کا کہنا ہے کہ قیدی کی موت اور میت حوالگی کے حوالے سے تمام قانونی تقاضے پورے کیے جا رہے ہیں جبکہ متعلقہ ادارے معاملے کا جائزہ بھی لے رہے ہیں۔
واضح رہے کہ اڈیالہ جیل میں قید ملزمان اور قیدیوں کو طبیعت خراب ہونے کی صورت میں جیل ہسپتال یا ضرورت پڑنے پر سرکاری ہسپتال منتقل کیا جاتا ہے جہاں انہیں طبی سہولیات فراہم کی جاتی ہیں۔
