ملک کی نامور شیف راحت علی انتقال کر گئیں
ان کے انتقال کی اطلاع سامنے آتے ہی سوشل میڈیا پر تعزیتی پیغامات کا سلسلہ شروع ہو گیا اور ہر طرف سوگ کی فضا دیکھنے میں آئی۔
واضح رہے کہ شیف راحت علی اپنی منفرد، آسان اور مزیدار تراکیب کے باعث ملک بھر میں بے حد مقبول تھیں۔ انہوں نے کئی سالوں تک مختلف ٹی وی پروگرامز اور پلیٹ فارمز کے ذریعے گھریلو خواتین اور نوجوانوں کو سادہ انداز میں کھانا پکانے کی تربیت دی۔ ان کی ترکیبیں نہ صرف آسان تھیں بلکہ ذائقے کے اعتبار سے بھی انتہائی پسند کی جاتی تھیں، جس کی وجہ سے وہ لاکھوں دلوں میں جگہ بنانے میں کامیاب رہیں۔
شیف راحت علی کے انتقال کی خبر ان کی بھانجی نے سوشل میڈیا کے ذریعے دی، جس کے بعد یہ خبر تیزی سے پھیل گئی۔ ان کے انتقال کو مداحوں نے ایک بڑا نقصان قرار دیا ہے۔
شیف راحت علی کی بیٹی مائدہ بھی کھانا پکانے کے شعبے سے وابستہ ہیں اور اس وقت امریکہ میں مقیم ہیں۔ وہ بھی اپنی والدہ کے نقش قدم پر چلتے ہوئے اس شعبے میں خدمات انجام دے رہی ہیں۔
یہ بھی پڑھیں:گرمی کے بعد بارشوں کی نوید، ہائی الرٹ جاری
سوشل میڈیا پر مداحوں کی جانب سے شیف راحت علی کیلئے دعائے مغفرت اور تعزیتی پیغامات کا سلسلہ جاری ہے۔ ایک مداح نے لکھا کہ اللہ انہیں جنت الفردوس میں اعلیٰ مقام عطا فرمائے، جبکہ ایک اور صارف نے کہا کہ یہ خبر انتہائی افسوسناک اور ناقابل یقین ہے، انہوں نے ہمیں کھانا پکانا سکھایا اور ان کی ترکیبیں ہمیشہ یاد رہیں گی۔
