ایل این جی کی قیمت میں 21 فیصد سے زائد کمی، نوٹیفکیشن جاری
جاری کردہ نوٹیفکیشن کے مطابق دونوں گیس کمپنیوں کے نظام پر ایل این جی کی قیمت میں 21 فیصد سے زائد تک کمی ریکارڈ کی گئی ہے۔
اوگرا کے جاری کردہ نوٹیفکیشن کے مطابق سوئی ناردرن گیس پائپ لائنز کے نظام پر ایل این جی کی قیمت میں 3.83 ڈالر فی ایم ایم بی ٹی یو کمی کی گئی ہے۔ قیمت میں کمی کے بعد سوئی ناردرن سسٹم پر ایل این جی کی نئی قیمت 15.19 ڈالر فی ایم ایم بی ٹی یو مقرر کردی گئی ہے۔
اسی طرح سوئی سدرن گیس کمپنی کے نظام پر بھی ایل این جی کی قیمت میں نمایاں کمی کی گئی ہے۔ نوٹیفکیشن کے مطابق سوئی سدرن سسٹم پر ایل این جی 3.91 ڈالر فی ایم ایم بی ٹی یو سستی ہوئی، جس کے بعد نئی قیمت 14.22 ڈالر فی ایم ایم بی ٹی یو مقرر کردی گئی ہے۔
واضح رہے کہ اوگرا کی جانب سے جاری کردہ قیمتوں کا اطلاق ستمبر کیلئے کیا گیا ہے، ایل این جی کی قیمتوں میں کمی کا تعلق عالمی مارکیٹ میں توانائی کی قیمتوں، درآمدی لاگت اور دیگر متعلقہ عوامل سے ہوتا ہے۔
ایل این جی ملک کی توانائی کی ضروریات پوری کرنے میں اہم کردار ادا کرتی ہے اور اس کی قیمت میں ہونے والی تبدیلیاں گیس کے شعبے کے علاوہ صنعتی اور دیگر صارفین کے اخراجات پر بھی اثر انداز ہوسکتی ہیں۔
یہ بھی پڑھیں:عالمی منڈی میں تیل کی قیمتیں مزید گر گئیں
نئی قیمتوں کے اجرا کے بعد صارفین اور صنعتی شعبے کی نظریں اس بات پر ہوں گی کہ ایل این جی کی قیمتوں میں کمی کے اثرات توانائی کے مجموعی اخراجات پر کس حد تک مرتب ہوتے ہیں۔
