پاکستان اسٹاک مارکیٹ میں آج پھر شدید مندی
مارکیٹ میں فروخت کا دباؤ بڑھنے سے کے ایس ای 100 انڈیکس ایک لاکھ 70 ہزار پوائنٹس کی اہم نفسیاتی حد برقرار نہ رکھ سکا اور کاروبار کے آغاز ہی میں نمایاں کمی ریکارڈ کی گئی۔
مارکیٹ سے موصول ہونے والے اعداد و شمار کے مطابق جمعہ کے روز کاروبار شروع ہوتے ہی سرمایہ کاروں کی جانب سے شیئرز کی فروخت میں اضافہ دیکھنے میں آیا، جس کے نتیجے میں کے ایس ای 100 انڈیکس 1,800 سے زائد پوائنٹس گر کر ایک لاکھ 69 ہزار 885 پوائنٹس کی سطح پر آ گیا۔ مارکیٹ میں غیر یقینی صورتحال اور سرمایہ کاروں کا محتاط رویہ مندی کی بڑی وجوہات میں شامل ہیں۔
ذہن نشین رہے کہ گزشتہ کاروباری روز بھی اسٹاک مارکیٹ شدید دباؤ کا شکار رہی تھی، جہاں کاروبار کے اختتام پر کے ایس ای 100 انڈیکس 2,690 پوائنٹس کی کمی کے بعد ایک لاکھ 71 ہزار 739 پوائنٹس پر بند ہوا تھا، مسلسل دوسرے روز بڑی کمی نے سرمایہ کاروں میں تشویش پیدا کر دی ہے۔
دوسری جانب زرمبادلہ مارکیٹ سے نسبتاً مثبت خبر سامنے آئی، جہاں امریکی ڈالر کی قدر میں معمولی کمی ریکارڈ کی گئی۔ اسٹیٹ بینک آف پاکستان کے مطابق انٹربینک مارکیٹ میں ڈالر ایک پیسہ سستا ہو کر 277.90 روپے پر بند ہوا، جبکہ گزشتہ روز اس کی قیمت 277.91 روپے تھی۔
اوپن مارکیٹ میں بھی امریکی ڈالر 8 پیسے کمی کے بعد 279.86 روپے پر آ گیا، تاہم دیگر غیر ملکی کرنسیوں میں اضافہ دیکھا گیا، جہاں یورو 60 پیسے مہنگا ہو کر 322.78 روپے، برطانوی پاؤنڈ 30 پیسے اضافے کے ساتھ 378.62 روپے، یو اے ای درہم 76.85 روپے اور سعودی ریال 75.12 روپے پر پہنچ گیا۔
یہ بھی پڑھیں:خام تیل کی قیمتیں 102 ڈالر سے تجاوز کر گئیں
معاشی ماہرین کا کہنا ہے کہ سرمایہ کار آئندہ معاشی اور مالیاتی پالیسیوں پر گہری نظر رکھے ہوئے ہیں، جبکہ مارکیٹ میں استحکام کیلئے سرمایہ کاروں کے اعتماد کی بحالی کو انتہائی اہم قرار دیا جا رہا ہے۔
