پاکستان میں ایرانی ریال کی خریداری میں غیر معمولی اضافہ
کرنسی مارکیٹ ذرائع کے مطابق امن معاہدے کے بعد گزشتہ پانچ روز کے دوران شہریوں کی بڑی تعداد نے ایرانی ریال کی خریداری میں دلچسپی ظاہر کی۔
رپورٹ کے مطابق اس مختصر عرصے کے دوران پاکستانی شہریوں نے تقریباً 3 کھرب روپے مالیت کے ایرانی ریال خریدے جس کے نتیجے میں اوپن مارکیٹ میں ایرانی ریال کی قدر میں 100 فیصد تک اضافہ ریکارڈ کیا گیا۔
ایکسچینج کمپنیز ایسوسی ایشن کے سربراہ ملک بوستان نے اس رجحان کی تصدیق کرتے ہوئے بتایا کہ حالیہ دنوں میں متوسط طبقے کی جانب سے ایرانی ریال کی خریداری میں غیر معمولی اضافہ ہوا ہے۔
انہوں نے کہا کہ اس سے قبل 2 ہزار روپے میں ایک کروڑ ایرانی ریال دستیاب تھے تاہم اب یہی رقم خریدنے کے لیے تقریباً 4 ہزار روپے ادا کرنا پڑ رہے ہیں۔
ملک بوستان کا کہنا تھا کہ ایران اور امریکا کے درمیان معاہدے کے بعد لوگوں میں یہ تاثر مضبوط ہوا ہے کہ آنے والے دنوں میں ایرانی کرنسی کی قدر میں مزید بہتری آسکتی ہے، اسی توقع کے باعث خریداری کا رجحان بڑھا ہے۔
یہ بھی پڑھیں: امریکا کیساتھ ڈیل، ایرانی کرنسی کی قدر میں نمایاں اضافہ
انہوں نے عوام کو خبردار کیا کہ ایرانی ریال کی خرید و فروخت صرف لائسنس یافتہ منی چینجرز کے ذریعے کی جائے تاکہ جعلی کرنسی، فراڈ یا غیر قانونی لین دین سے بچا جا سکے۔
ماہرین کے مطابق اگر ایران اور امریکا کے درمیان امن عمل آگے بڑھتا ہے تو خطے کی تجارت، توانائی مارکیٹ اور کرنسی رجحانات پر اس کے مزید اثرات سامنے آسکتے ہیں۔
