لاہور: دکانداروں نے ایل پی جی کے سرکاری نرخ نامے ہوا میں اڑا دیے
رپورٹ کے مطابق اوگرا کی جانب سے ایل پی جی کی سرکاری طور پر قیمت 308 روپے فی کلو مقرر کی گئی ہے لیکن لاہور شہر میں ایل پی جی 480 سے 500 روپے فی کلو تک فروخت ہو رہی ہے۔
شہریوں کا کہنا ہے کہ اوپن مارکیٹ میں ایل پی جی کی قیمتوں میں آئے روز اضافہ ہو رہا ہے اور بعض علاقوں میں روزانہ کی بنیاد پر ایل پی جی کی قیمتوں میں 10 سے 20 روپے فی کلو تک اضافہ دیکھا جا رہا ہے۔
ایل پی جی کی قیمتوں میں ہوشربا اضافے کے باعث گھریلو صارفین کے لیے کھانا پکانا بھی مشکل ہو چکا ہے جبکہ متوسط اور کم آمدنی والے طبقے پر ایندھن کی قیمتوں میں اضافہ شدید مالی دباؤ کا سبب بن رہا ہے۔
ادھر رکشہ ڈرائیورز نے بھی ایل پی جی کی آسمان سے باتیں کرتی قیمتوں پر گہری تشویش کا اظہار کیا ہے۔
یہ بھی پڑھیں: پٹرولیم مصنوعات پر عوام کے لیے مزید ریلیف کا اعلان کر دیا گیا
رکشہ ڈرائیورز کا کہنا ہے کہ ایندھن مہنگا ہونے کے باعث آمدن متاثر ہو رہی ہے اور روزگار کے مسائل میں اضافہ ہو رہا ہے۔
شہریوں نے ضلعی انتظامیہ سے مطالبہ کیا ہے کہ ایل پی جی کے سرکاری نرخ ناموں پر سختی سے عملدرآمد کو یقینی بنایا جائے تاکہ عوام کو مہنگائی کے اس دور میں کچھ ریلیف مل سکے۔
