مجتبیٰ خامنہ ای اب مکمل صحت مند ہیں، ایرانی صدر
تفصیلات کے مطابق امریکی نشریاتی ادارے کو دیے گئے انٹرویو میں مسعود پزشکیان نے بتایا کہ ان کی مجتبیٰ خامنہ ای سے دو مرتبہ ملاقات ہوئی ہے، ایک ملاقات سات گھنٹے سے زائد جاری رہی، اس دوران مجتبیٰ خامنہ ای کی صحت کے حوالے سے کوئی خاص مسئلہ نظر نہیں آیا۔
مسعود پزشکیان نے کہا کہ وہ بطور ڈاکٹر یہ بات کہہ سکتے ہیں کہ ایرانی سپریم لیڈر طبی اعتبار سے مکمل صحت مند ہیں اور ان کے سابقہ زخم بھی صحت یاب ہوچکے ہیں۔
ایرانی صدر نے ایران اور امریکا کے درمیان جاری کشیدگی پر بات کرتے ہوئے کہا کہ دونوں ممالک کے درمیان بداعتمادی کی فضا موجود ہے، مذاکرات کی بحالی کیلئے امریکا کی جانب سے ایران کی پیشکش قبول کرنا ضروری ہوگا۔
آبنائے ہرمز کے حوالے سے مسعود پزشکیان نے کہا کہ اگر ایرانی پیشکش قبول کی جاتی ہے تو ایران آبنائے ہرمز کھولنے اور مذاکرات بحال کرنے سے متعلق اپنے وعدوں کی پاسداری کرے گا، امریکی منظوری کے بعد اسی دن مذاکرات کا عمل شروع ہوسکتا ہے۔
جوہری پروگرام پر گفتگو کرتے ہوئے ایرانی صدر نے کہا کہ ایران جوہری ہتھیار بنانے کی کوشش نہیں کررہا، جوہری ہتھیار تیار کرنا مذہبی اعتبار سے حرام ہے۔
یہ بھی پڑھیں:سعودی عرب جانے والے افراد کیلئے بڑی سہولت کا اعلان
مسعود پزشکیان نے مزید کہا کہ ایران اقوام متحدہ کے جوہری معائنہ کاروں کو ملک میں داخلے کی اجازت دینے کیلئے تیار ہے اور جوہری معائنے کے معاملے پر مذاکرات کے دوران مخصوص معاہدہ طے کیا جاسکتا ہے۔
