فلپائن کے جزیرہ منڈاناؤ میں 6.5 شدت کا زلزلہ
زلزلہ پیما مرکز کے مطابق زلزلے کی شدت ریکٹر اسکیل پر 6.5 ریکارڈ کی گئی، جبکہ اس کا مرکز زمین میں 52 کلومیٹر کی گہرائی میں تھا۔
زلزلے کے جھٹکے اچانک محسوس ہونے پر لوگ گھروں اور عمارتوں سے باہر نکل آئے اور کھلے مقامات پر جمع ہو گئے۔ ابتدائی اطلاعات کے مطابق زلزلے سے کسی جانی یا مالی نقصان کی فوری طور پر کوئی اطلاع موصول نہیں ہوئی، تاہم حکام نے ممکنہ آفٹر شاکس کے خدشے کے پیش نظر شہریوں کو احتیاطی تدابیر اختیار کرنے کی ہدایت کی ہے۔
فلپائنی محکمہ موسمیات اور زلزلہ پیما ادارے کے مطابق زلزلے کے بعد صورتحال پر مسلسل نظر رکھی جا رہی ہے، جبکہ ریسکیو اداروں کو بھی الرٹ کر دیا گیا ہے تاکہ کسی بھی ہنگامی صورتحال سے فوری نمٹا جا سکے۔
منڈاناؤ فلپائن کا وہ خطہ ہے جہاں ٹیکٹونک پلیٹس کی حرکت کے باعث زلزلوں کے جھٹکے اکثر محسوس کیے جاتے ہیں۔
ماہرین کے مطابق یہ علاقہ پیسفک رنگ آف فائر کا حصہ ہے، جہاں زلزلہ خیز سرگرمیاں زیادہ پائی جاتی ہیں۔
یہ بھی پڑھیں:ایران نے آبنائے ہرمز میں 3 بحری جہازوں کو روک دیا
حکام نے شہریوں کو ہدایت دی ہے کہ وہ غیر ضروری طور پر کمزور عمارتوں میں داخل نہ ہوں اور ہنگامی صورتحال میں محفوظ مقامات پر رہیں، مزید یہ کہ کسی بھی ممکنہ آفٹر شاک کے دوران فوری طور پر حفاظتی اقدامات اپنانے پر زور دیا گیا ہے۔
تاحال صورتحال مکمل طور پر قابو میں ہے، تاہم حکام کی جانب سے نگرانی کا عمل جاری ہے۔
