واشنگٹن سے جاری ایک پیغام میں امریکی صدر ڈونلڈ ٹرمپ کا کہنا تھا کہ نیویارک الیکشن ہارنےکی بڑی وجہ شٹ ڈاؤن تھا،اس وقت طویل ترین حکومتی شٹ ڈاؤن کا سامنا کر رہے ہیں۔

انہوں نے کہا کہ امریکہ میں طویل ترین شٹ ڈاؤن ڈیموکریٹس کی وجہ سے ہوا،حکومت کاشٹ ڈاؤن ختم کرنا ضروری ہے،شٹ ڈاؤن سے ایئر لائنز اور سٹاک مارکیٹ متاثر ہو رہے ہیں۔

واضح رہے کہ امریکا میں 34 سالہ ڈیموکریٹک سوشلسٹ ظہران ممدانی نے امریکی صدر ڈونلڈ ٹرمپ کی مخالفت کے باوجود نیویارک سٹی کے میئر کا انتخاب جیت لیا۔

ظہران ممدانی کا مقابلہ نیویارک کے سابق گورنر اور آزاد امیدوار اینڈریو کومو اور ری پبلکن حریف کرٹس سلوا سے تھا، ظہران ممدانی 4 لاکھ 86 ہزار 741 ووٹ لیکر نیویارک سٹی کے میئر بن گئے جبکہ ان کے مدمقابل آزاد امیدوار نیڈریو کومو نے 3 لاکھ 96 ہزار 177 ووٹ لئے، ری پبلکن کے کرٹس سلوا صرف 79 ہزار 281 ووٹ لے سکے۔

یہ بھی پڑھیں: امریکی صدر ٹرمپ کو دھچکا، ظہران ممدانی نیویارک کے میئر منتخب

نیویارک میئر کے الیکشن میں نئی تاریخ رقم ہوگئی جہاں 2001ء کے بعد میئر کے انتخابات میں سب سے زیادہ ٹرن آؤٹ ریکارڈ کیا گیا، پولنگ سٹیشنز پر شہریوں کی بڑی تعداد موجود رہی اور 17 لاکھ سے زائد ووٹرز نے حق رائے دہی استعمال کیا۔

دوسری جانب ڈیمو کریٹ پارٹی کی رہنما غزالہ ہاشمی نے ریاست ورجینیا کے لیفٹیننٹ گورنر کا انتخاب جیت کر پہلی مسلم لیفٹیننٹ خاتون بننے کا اعزاز حاصل کر لیا۔