واٹس ایپ صارفین کیلئے بڑی خوشخبری، نیا فیچر شامل
تفصیلات کے مطابق واٹس ایپ نے اینڈرائیڈ اور آئی او ایس صارفین کیلئے نیا فیچر متعارف کرایا ہے، جس کے تحت کسی بھی چیٹ کو کھولتے ہی فون کی گیلری میں محفوظ تازہ ترین تصویر یا ویڈیو بھیجنے کی تجویز سامنے آئے گی۔
اس نئے فیچر میں چیٹ بار کے اوپر تازہ ترین میڈیا فائل کا چھوٹا تھمب نیل دکھائی دے گا، جبکہ بعض صارفین کیلئے کیمرے کا آئیکون عارضی طور پر اسی تھمب نیل سے تبدیل ہوسکتا ہے۔
صارف اس تھمب نیل پر ٹیپ کرکے تصویر یا ویڈیو شیئر کرنے سے پہلے اس میں ترمیم بھی کرسکے گا، اس دوران کیپشن اور اسٹیکرز شامل کرنے کی سہولت بھی دستیاب ہوگی۔ تاہم صرف تھمب نیل پر ٹیپ کرنے سے میڈیا فائل خودکار طور پر دوسرے شخص کو نہیں بھیجی جائے گی۔
اس فیچر میں صارفین کو مکمل اختیار حاصل ہوگا کہ وہ تصویر یا ویڈیو شیئر کریں یا اس تجویز کو نظر انداز کردیں۔ یہ سہولت عام تصاویر، اسکرین شاٹس اور دیگر ایپس سے محفوظ کی گئی ویڈیوز کے لیے بھی کام کرے گی۔
واٹس ایپ کے مطابق یہ فیچر صارفین کے اکاؤنٹس پر خودکار طور پر فعال ہوگا، اگر کوئی صارف اسے استعمال نہیں کرنا چاہتا تو سیٹنگز میں چیٹس کے سیکشن میں جاکر Recent Media Suggestion کا آپشن بند کرسکتا ہے۔
نئے فیچر کی فراہمی مرحلہ وار جاری ہے اور آنے والے ہفتوں میں مزید اینڈرائیڈ اور آئی او ایس صارفین کو بھی یہ سہولت فراہم کردی جائے گی۔
