کرہ ارض شمسی طوفان کی لپیٹ میں، سپارکو
August, 14 2024
اسلام آباد: (سنو نیوز) سورج سے خارج ہونے والے مواد اور توانائی کی وجہ سے جیو مقناطیسی طوفان زمین کے راستے پر ہے جس سے سیٹلائٹس، پاور گرڈ، خلائی اسٹیشن خطرے میں ہیں۔
انسٹی ٹیوٹ آف اسپیس ٹیکنالوجی اسلام آباد نے سورج کی سطح کی خصوصی تصاویر جاری کردیں، 3 کورونل ماس ایجیکشنز (سی ایم ایز) فی الحال سیارہ زمین کے راستے میں ہیں۔
ترجمان سپارکو کے مطابق پہلے دو ایم کلاس سولر فلیئرز 7 اگست کو جاری ہوئے، ابتدائی سی ایم ایز نسبتاً معمولی تھے، لیکن تیسرا کلاس سولر فلئیر ان سے کہیں زیادہ طاقتور ہے۔
سورج کی سطح سے مزید ایم کلاس فلیئرجاری ہوئے ہیں، سورج کی سطح سے اٹھنے والے پلازمہ اور مقناطیسی لہروں کے اثرات اگلے 3 سے 4 دن تک زمین پر آنے کی توقع ہے۔
ترجمان سپارکو کے مطابق جیسے ہی سورج اپنی سرگرمی کے عروج پر پہنچتا ہے، زمین سے ٹکرانے والے طوفان سے متعلقہ خطرات میں بھی اضافہ ہوجاتا ہے۔
شمسی طوفان کے نتیجے میں ریڈیو بلیک آؤٹ، غیر فعال سیٹلائٹ کے ساتھ سیلولر فون اور جی پی ایس نیٹ ورک شدید متاثر ہوتا ہے۔
