میسی کے والد کے انتقال کی جھوٹی خبر پر اینکر مستعفی

میڈیا رپورٹس کے مطابق 51 سالہ ٹی وی ہوسٹ فلورینسیا پینا نے ایک لائیو پروگرام کے دوران اچانک اعلان کیا کہ لیونل میسی کے والد جارج میسی انتقال کر گئے ہیں۔

لائیو نشریات کے فوراً بعد یہ خبر سوشل میڈیا پر تیزی سے پھیل گئی اور پورے ارجنٹینا میں تشویش اور غم کی لہر دوڑ گئی۔ تاہم کچھ ہی دیر بعد فلورینسیا پینا نے وضاحت کرتے ہوئے کہا کہ اس خبر کی مکمل تصدیق نہیں ہو سکی ہے، جس کے بعد معاملہ مزید سنگین ہو گیا۔

جب یہ خبر میسی کے خاندان تک پہنچی تو انہوں نے فوری طور پر اس کی تردید کرتے ہوئے اسے بے بنیاد قرار دیا۔ خاندان کے مطابق جارج میسی ایک بیماری کے باعث زیر علاج ضرور ہیں، تاہم ان کی صحت بہتر ہو رہی ہے اور انتقال کی خبر میں کوئی صداقت نہیں۔

یہ بھی پڑھیں:ندا ڈار نے کرکٹ ٹیم میں واپسی کا اعلان کر دیا

اس صورتحال کے بعد فلورینسیا پینا نے سوشل میڈیا پر ایک تفصیلی معذرتی بیان جاری کرتے ہوئے کہا کہ انہیں یہ اطلاع اپنی پروڈکشن ٹیم سے ملی تھی اور انہوں نے اس پر یقین کر لیا، جس پر وہ شدید شرمندہ ہیں۔ انہوں نے میسی کے خاندان اور ناظرین سے معافی مانگتے ہوئے اپنے عہدے سے استعفیٰ دینے کا اعلان بھی کر دیا۔

دوسری جانب ٹی وی چینل انتظامیہ نے واقعے کی تحقیقات شروع کر دی ہیں تاکہ غلط خبر نشر ہونے کی وجوہات کا تعین کیا جا سکے۔