صدر پاکستان سائیکلنگ فیڈریشن سید اظہر علی شاہ کے مطابق نتالیہ خان گردوں کے عارضے میں مبتلا تھیں اور طویل عرصے سے علاج معالجے کے عمل سے گزر رہی تھیں۔ ان کی سرجری بھی کی گئی تھی، تاہم وہ مکمل طور پر صحت یاب نہ ہو سکیں اور ان کی طبی حالت مسلسل بگڑتی رہی، جس کے باعث وہ جانبر نہ ہو سکیں۔

واضح رہے کہ نتالیہ خان نے پاکستان کی نمائندگی مختلف قومی سطح کے مقابلوں میں کی اور وہ ایک باصلاحیت کھلاڑی کے طور پر جانی جاتی تھیں، ان کی اچانک وفات نے کھیلوں کی برادری کو افسردہ کر دیا ہے۔

صدر پاکستان سائیکلنگ فیڈریشن سید اظہر علی شاہ نے ان کے انتقال پر گہرے دکھ اور افسوس کا اظہار کرتے ہوئے کہا کہ فیڈریشن کے تمام اراکین اس خبر سے انتہائی رنجیدہ ہیں۔

یہ بھی پڑھیں:میگا میراتھن اور سائیکلنگ ریس کا اعلان

انہوں نے مرحومہ کے اہل خانہ سے دلی ہمدردی اور تعزیت کا اظہار بھی کیا۔

کھیلوں سے وابستہ افراد نے بھی نتالیہ خان کی وفات کو پاکستان کے کھیلوں کیلئے بڑا نقصان قرار دیتے ہوئے ان کی خدمات کو خراجِ عقیدت پیش کیا ہے۔