وزیراعظم فیول ریلیف اسکیم پر عمل نہ کرنے والے مالکان کیلئے بُری خبر
پیٹرولیم ڈویژن نے متعلقہ اداروں کو کارروائی کیلئے خط لکھ دیا، جبکہ خلاف ورزی کرنے والے پیٹرول پمپس کی فہرست بھی فراہم کردی گئی ہے۔
تفصیلات کے مطابق پیٹرولیم ڈویژن نے آئل اینڈ گیس ریگولیٹری اتھارٹی (اوگرا) اور نیسپا کو مراسلہ ارسال کیا ہے، جس میں وزیراعظم فیول سبسڈی اسکیم پر عمل درآمد نہ کرنے والے پیٹرول پمپس کے خلاف کارروائی کی ہدایت کی گئی ہے۔
خط کے متن کے مطابق ملک بھر میں مجموعی طور پر 163 پیٹرول پمپس ایسے ہیں جو وزیراعظم کی جانب سے فراہم کردہ فیول سبسڈی صارفین تک پہنچانے میں ناکام رہے ہیں۔
پیٹرولیم ڈویژن کی فراہم کردہ فہرست کے مطابق پنجاب میں سب سے زیادہ 106 پیٹرول پمپس نے فیول سبسڈی پر عمل درآمد نہیں کیا، جبکہ سندھ میں 47 پیٹرول پمپس کی جانب سے سبسڈی دینے سے انکار کیا گیا۔
اسی طرح خیبر پختونخوا اور گلگت بلتستان میں بھی پانچ، پانچ پیٹرول پمپس وزیراعظم فیول ریلیف اسکیم پر عمل درآمد نہیں کر رہے۔
پیٹرولیم ڈویژن نے متعلقہ اداروں کو ہدایت کی ہے کہ خلاف ورزی کرنے والے پیٹرول پمپس کے خلاف ضروری کارروائی عمل میں لائی جائے تاکہ حکومتی ریلیف عوام تک پہنچایا جاسکے۔
یہ بھی پڑھیں:مولانا فضل الرحمان سے منسلک مدارس کو سی ڈی اے کے نوٹس جاری
حکام کے اس فیصلے کے بعد فیول سبسڈی فراہم نہ کرنے والے پیٹرول پمپس کے خلاف کارروائی کا امکان ہے، جبکہ صارفین کو ریلیف کی فراہمی یقینی بنانے کے لیے نگرانی بھی سخت کیے جانے کی توقع ہے۔
