مولانا صاحب کو حکومت میں حصہ نہیں ملا، اس لیے ناراض ہیں: فیصل کریم کنڈی
پشاور میں میڈیا سے گفتگو کرتے ہوئے فیصل کریم کنڈی نے کہا کہ صوبے میں دہشت گردی کے خاتمے کیلئے انٹیلیجنس بیسڈ آپریشنز کیے جا رہے ہیں، جن کے نتیجے میں دہشت گردی کے واقعات میں کمی آنے کی توقع ہے۔
گورنر خیبر پختونخوا کا کہنا تھا کہ اگر مخالفین کو پھولوں کا شہر بنا کر تمام سہولیات بھی فراہم کردی جائیں تو وہ پھر بھی تنقید کریں گے۔ گزشتہ 13 سال کے دوران صوبے میں جو کچھ ہوا، اسے درست کرنے کیلئے موجودہ حکومت اقدامات کر رہی ہے اور کسی کو معاف نہیں کیا جائے گا۔
انہوں نے کہا کہ صوبے کی بہتری کیلئے بہتر قوانین بنائے جائیں گے اور قانون سازی کے ذریعے عوامی مسائل حل کرنے کی کوشش کی جائے گی۔
سرکاری ہیلی کاپٹر کے استعمال پر وضاحت دیتے ہوئے فیصل کریم کنڈی نے کہا کہ ہیلی کاپٹر گورنر، وزیراعلیٰ اور وزیراعظم کے سرکاری کاموں کیلئے ہوتے ہیں۔ انہوں نے واضح کیا کہ انہوں نے سرکاری ذمہ داری کے سلسلے میں ہیلی کاپٹر استعمال کیا، کسی عیاشی کیلئے نہیں۔
تجاوزات کے خلاف کارروائیوں پر ان کا کہنا تھا کہ ماضی میں پیسے لے کر اجازت نامے جاری کیے جاتے رہے، جبکہ اب تجاوزات ختم کی جا رہی ہیں۔
یہ بھی پڑھیں:جماعت اسلامی کا ایک بار پھر سڑکوں پر آنے کا اعلان
انہوں نے مزید کہا کہ متاثرہ افراد اور ریڑھی بانوں کیلئے بھی منصوبہ بندی کی جا رہی ہے تاکہ انہیں مناسب جگہ فراہم کی جاسکے۔ پولیو ورکرز پر حملوں کی روک تھام اور صوبے میں پولیو کے خاتمے کیلئے بھی اقدامات جاری ہیں۔
